Kosova për herë të parë do të jetë nikoqire e konferencës vjetore të Shoqatës Evropiane të Kartës Rinore (EYCA).
Në prag të konferencës së 41-të vjetore të EYCA-së, në Prishtinë u mbajt një konferencë për media, ku u vlerësua rëndësia e konferencës vjetore si diçka që Kosovën e vendosë “në hartën e bashkëpunimeve evropiane për rininë”.
Sekretari i Përgjithshëm i Ministrisë së Kulturës, Rinisë dhe Sportit, (MKRS), Bislim Bislimi, theksoi rëndësinë e konferencës për politikat rinore dhe shkëmbimet ndërkombëtare.
Mundesh me e lexu edhe…
“Kosova po e tregon veten si partnere e denjë në përpjekjet evropiane për të rinjtë“, u shpreh ai.
Drejtori i EYCA-s, Manel Sanchez, falënderoi Ministrinë për bashkëpunimin dhe theksoi vlerën që kjo konferencë sjell për njohjen e potencialit kulturor dhe rinor të Kosovës.
Kjo konferencë do të shërbejë si platformë e rëndësishme për shkëmbimin e ideve dhe përvojave mes organizatave partnere dhe institucioneve evropiane, duke fuqizuar më tej rolin e të rinjve në zhvillimin shoqëror dhe kulturor, raporton Anadolu.
Për organizim të kësaj ngjarje e cila do të mbahet në Prishtinë, nga data 24 deri më 26 qershor 2025, u nënshkrua javë më parë memorandumi i bashkëpunimit mes MKRS-së dhe Shoqatës Evropiane të Kartës për Rini (EYCA).
EYCA përfaqëson 38 shtete evropiane dhe lëshon Kartën Evropiane për të Rinj, që ofron përfitime të shumta për të rinjtë nën 30 vjeç.
Kosova u bë anëtare e plotë e kësaj shoqate në dhjetor 2023./AA/Katror.info
