Oda Ekonomike e Kosovës (OEK) ka bërë të ditur se Gjykata Komerciale në Prishtinë ka marrë vendim për pezullimin e njoftimit të Zyrës së Rregullatorit për Energji (ZRrE), i cili parashihte daljen e detyrueshme të bizneseve në tregun e lirë të energjisë elektrike, shkruan Katror.info.
Bazuar në këtë vendim, OEK i ka bërë thirrje ZRrE-së që të ndalojë menjëherë çdo veprim të mëtejmë që mund të ndikojë negativisht në funksionimin dhe stabilitetin e bizneseve në vend. Oda thekson se vendimi i Gjykatës është një hap i rëndësishëm për të siguruar një proces të drejtë dhe të planifikuar mirë për liberalizimin e tregut të energjisë.
“OEK nuk është kundër daljes në tregun e lirë, por ne kemi kërkuar vazhdimisht që kjo të ndodhë në mënyrë të organizuar dhe me një fazë tranzitore të qartë, që garanton mbrojtje për bizneset dhe qytetarët e Kosovës,” thuhet në njoftimin e Odës.
Mundesh me e lexu edhe…
OEK ka ftuar ZRrE-në për një bashkëpunim të ngushtë në hartimin e kësaj faze tranzitore, duke vlerësuar se vetëm përmes dialogut dhe planifikimit të përbashkët mund të arrihet një zgjidhje e qëndrueshme dhe e drejtë për të gjitha palët e përfshira./Katror.info
