Sot, në ora 17:00, në veri të Mitrovicës pritet të vendoset gurthemeli i dy urave të reja mbi lumin Ibër, në kuadër të Memorandumit të Bashkëpunimit ndërmjet Ministrisë së Mjedisit, Planifikimit Hapësinor dhe Infrastrukturës dhe komunave të Mitrovicës së Jugut dhe asaj të Veriut, shkruan Katror.info.
Ceremonia do të nisë me vendosjen e gurthemelit të urës për kalimin e veturave, në afërsi të objektit të Komunës së Mitrovicës së Veriut. Më pas, në orën 17:15, është paraparë një ecje simbolike drejt pikës tjetër, ku në orën 17:30 do të vendoset gurthemeli i urës për kalimin e këmbësorëve, përballë kopshtit të fëmijëve “Gëzimi ynë”, në Mitrovicën e Jugut.
Në këtë ngjarje pritet të marrin pjesë kryeministri në detyrë i Republikës së Kosovës, Albin Kurti, kryetari i Komunës së Mitrovicës së Veriut, Erden Atiq, nënkryetari i Komunës së Mitrovicës së Jugut, Arian Tahiri, ministri në detyrë i Administrimit të Pushtetit Lokal dhe kryesues i Bordit të Përbashkët të dy komunave, Elbert Krasniqi, si dhe ministri në detyrë i Mjedisit, Planifikimit Hapësinor dhe Infrastrukturës, Liburn Aliu./Katror.info
