Presidentja Vjosa Osmani sot fillon një raund të ri takimesh dypalëshe me drejtuesit politikë të Kosovës, për të nxjerrë vendim mbi konstituimin e institucioneve pas dështimit të 40-të për konstituimin e Kuvendit të Kosovës.
Takimet do të zhvillohen paradite dhe pasdite, nga ora 10:00 deri në 16:00, të mërkurë dhe të enjten. Sot Osmani do t’i pres liderët e partive më të mëdha në vend, teksa nesër ata të partive minoritare.
Kryetari i Vetëvendosjes, Albin Kurti, do të jetë i pari në takim, ndjekur nga kryetarët e PDK-së, Memli Krasniqi; LDK-së, Lumir Abdixhiku; dhe në fund, AAK-së, Ramush Haradinaj.
Mundesh me e lexu edhe…
Sipas mediave, Krasniqi konfirmoi pjesëmarrjen dhe e konsideroi këtë lëvizje si “pozitive, por me rezultate ende të pasigurta”, duke e cilësuar bllokadën politike si rezultat të qëndrimeve të Vetëvendosjes.
Kryeministri në detyrë, Kurti, konfirmoi gjithashtu se do të marrë pjesë në këtë raund takimesh, duke theksuar se ai ka qenë i pranishëm edhe në raundet e mëparshme. Disa nga përfaqësuesit e LDK-së dhe AAK-së po ashtu e kanë konfirmuar pjesëmarrjen, duke marrë pjesë aktive në diskutime.
Qëllimi i kryerjes së këtyre takimeve është të zgjidhet mosmarrëveshja politike për konstituimin e Kuvendit, edhe pas interpretimeve të ndryshme të vendimit të Gjykatës Kushtetuese, që përcaktoi zbatimin e seancës për zgjedhjen e kryeparlamentarit brenda 30 ditësh.
Përpjekjet e mëparshme për arritjen e një marrëveshjeje mes partive nuk dhanë rezultat, edhe pse u prezantuan disa propozime; përfaqësuesit e PDK-së, LDK-së dhe AAK-së i quanë takimet e mëparshme si të pa frytshme dhe të shkëputura nga vullneti për zgjidhje./Katror.info
