E përditësuar 12:26:
Kryeministri në detyrë, Albin Kurti, pas takimit me presidenten Vjosa Osmani, ka deklaruar se duhet të mbahen edhe takime të tjera për të parë progresin që do të nxjerrin këto bisedime.
Kurti, para gazetarëve, deklaroi se deri në fund të muajit korrik duhet të përfundojë konstituimi i Kuvendit.
Mundesh me e lexu edhe…
“Në javën e fundit të korrikut duhet ta kemi konstituimin e legjislaturës së nëntë. Do të bëjmë çmos që kjo të ndodhë në frymën e bashkëpunimit. Unë besoj se duhet t’i japim shansin edhe takimeve të tjera dhe në fund të shohim se cili është progresi nga takimet e zhvilluara”.
“I përmenda të gjitha elementet përbërëse, diskutuam gjëra të gjata dhe në fund na mbetet të shohim nëse kemi bërë përparim”, deklaroi Kurti.
Kurti refuzoi t’i përgjigjej pyetjeve të gazetarëve nëse do të ketë propozime të reja për pozitën e kryeparlamentarit.
Gjatë takimit mes Osmanit dhe Kurtit është parë duke hyrë në objektin e Presidencës së Kosovës edhe e ngarkuarja me punë në Ambasadën e Shteteve të Bashkuara të Amerikës në Kosovë, Anu Prattipati.
***
Vazhdon takimi Osmani – Kurti, në Presidencë shkon edhe Anu Prattipati
Janë bërë dy orë që kur ka nisur takimi ndërmjet Presidentes së Kosovës, Vjosa Osmani, dhe liderit të Lëvizjes Vetëvendosje, Albin Kurti, në kuadër të përpjekjeve për të zgjidhur ngërçin politik që po e pengon konstituimin e Kuvendit dhe formimin e institucioneve të reja, shkruan Katror.info.
Takimi, që ka filluar në orën 10:00 në ndërtesën e Presidencës, nuk ka përfunduar ende, dhe deri më tani nuk janë dhënë detaje zyrtare për rrjedhën ose përmbajtjen e diskutimeve.
Gjithashtu gjatë hyrjes në ndërtesën e Presidencës, është vërejtur edhe Anu Prattipati, e ngarkuara me punë në Ambasadën e ShBA-së, por nuk është konfirmuar nëse ajo ka marrë pjesë në ndonjë takim.
Ftesa për këtë takim është bërë nga Presidentja Osmani, pasi Gjykata Kushtetuese e Kosovës publikoi aktgjykimin që obligon deputetët ta konstituojnë Kuvendin brenda 30 ditësh nga data e vendimit, më 26 qershor. Kjo ka shtyrë Presidenten që të mbledhë liderët partiakë për të gjetur një zgjidhje për krizën institucionale.
Përveç Kurtit, gjatë ditës Osmani do të takohet edhe me liderët e tjerë të partive parlamentare: Memli Krasniqin nga Partia Demokratike e Kosovës, Lumir Abdixhikun nga Lidhja Demokratike e Kosovës dhe Ramush Haradinajn nga Aleanca për Ardhmërinë e Kosovës./Katror.info
