Të gjithë njohim ndjenjën e etjes, e cila është shenja e parë e dehidratimit – një gjendje që mund të përkeqësohet shpejt, sipas BBC. Dehidratimi i lehtë deri në atë moderat zakonisht shfaqet pas disa orësh, në varësi të moshës, shëndetit dhe kushteve të ambientit.
Simptomat mund të përfshijnë lodhje, marramendje dhe konfuzion. Nëse nuk trajtohet, pas 24 orësh situata mund të rëndohet dhe të shkaktojë probleme serioze, përfshirë shokun dhe krizat epileptike.
Një formë më pak e njohur është dehidratimi i fshehur, i njohur edhe si dehidratimi kronik i nivelit të ulët. Ky ndodh kur organizmi qëndron i dehidratuar në mënyrë të vazhdueshme, por në mënyrë të butë, duke shkaktuar pasoja të ndryshme fizike dhe mendore.
Mundesh me e lexu edhe…
Efektet e dehidratimit të fshehur
Termi “dehidratim i fshehur” përshkruan një gjendje që shpesh kalon pa u vënë re, por që mund të jetë shkaku i shumë shqetësimeve. Lodhja është një nga simptomat kryesore, së bashku me:
- Urinë të errët
- Gojë të thatë
- Marramendje
- Dhimbje koke
- Vështirësi në përqendrim
Në thelb, dehidratimi çon në një reduktim të vëllimit të gjakut, duke ulur presionin dhe rrjedhjen e gjakut në tru, gjë që shpjegon ndjenjën e lodhjes.
Pas drekës, shumica e njerëzve ndjejnë një rënie natyrale energjie, por nëse nuk pini ujë mjaftueshëm gjatë ditës, ky rënie mund të jetë më e theksuar.
Ekspertët rekomandojnë që të rriturit të konsumojnë gjashtë deri në tetë gota ujë (1.2 deri në 2 litra) të shpërndara në mënyrë të rregullt gjatë gjithë ditës.
Përveç sasive, cilësia e ujit është shumë e rëndësishme për mirëqenien tuaj.
Ndryshimi i zakoneve të pirjes së ujit dhe pirja e ujit në intervale të rregullta gjatë ditës mund të përmirësojë ndjeshëm energjinë dhe aftësinë për t’u përqendruar, duke luftuar kështu simptomat e dehidratimit të fshehur./Katror.info
