Festivali ndërkombëtar i animacionit Anibar ka hapur edicionin e tij të 16-të të dielën në Pejë, duke sjellë atmosferë të veçantë dhe pjesëmarrje të gjerë nën temën provokuese “WTF?!”. Ceremonia u hap me performancën e korit Siparantum, ndërsa filmi “A World in Chaos” ftoi publikun të reflektojë për gjendjen e planetit, shkruan Katror.info.
Hapjen e festivalit e zbukuroi performanca emocionuese e këngëtares Elsa Mala, ndërsa BESA M ndezi skenën me muzikë house dhe techno, duke i dhënë Pejës gjallëri që në natën e parë.
Gjatë javës së festivalit (14–20 korrik), në kuadër të Anibar 2025 do të shfaqen mbi 160 filma nga 51 vende, së bashku me aktivitete kreative, panele diskutimi dhe performanca artistike, që e shndërrojnë Pejën në një qendër ndërkombëtare të animacionit dhe mendimit të lirë./Katror.info
