Në Spitalin “Sheika Fatima” është inauguruar laboratori i ri, donacion i fondacionit “Khalifa Foundation”.
“Falë angazhimit të Presidentes së Republikës së Kosovës, Vjosa Osmani, dhe përkrahjes së vazhdueshme të donatorit tonë të rregullt, “Khalifa Foundation”, dje në Spitalin “Sheika Fatima”, është inauguruar laboratori i ri”, thuhet në njoftimin e Presidencës.
Sipas njoftimit, ky laborator i pajisur me teknologji bashkëkohore do të mundësojë kryerjen e shumicës së analizave brenda vetë institucionit, duke përmirësuar efikasitetin, cilësinë dhe qasjen në shërbime laboratorike, sidomos për fëmijët.
Mundesh me e lexu edhe…
“Kjo do të ndikojë drejtpërdrejt në përmirësimin e efikasitetit, cilësisë dhe qasjes së qytetarëve në shërbime më të avancuara laboratorike, me theks të veçantë tek fëmijët, të cilët janë përfituesit më të ndjeshëm dhe më të rëndësishëm të këtyre investimeve”, thuhet në njoftim.
Një pjesë e konsiderueshme e pajisjeve të reja do të përdoret në repartin e neonatologjisë, aty ku kujdesi mjekësor është vendimtar për jetën e bebeve dhe nënave.
Presidentja Osmani ka shprehur mirënjohje të thellë për popullin e Emirateve të Bashkuara Arabe dhe, në veçanti, për Lartmadhërinë e saj, Sheika Fatima bint Mubarak Al Ketbi, për kontributin e çmuar dhe bashkëpunimin e vazhdueshëm në përmirësimin e sistemit shëndetësor në Kosovë./Katror.info
