Ambasadori i Mbretërisë së Bashkuar në Kosovë ka reaguar me entuziazëm pas ceremonisë së organizuar nga Presidentja Vjosa Osmani për dhënien e nënshtetësisë së Kosovës këngëtares me famë botërore, Dua Lipa. Në një postim në rrjetet sociale, ambasadori u shpreh krenar që edhe Mbretëria e Bashkuar, ashtu si Kosova, e konsideron Dua Lipën si një prej të vetëve.
“Britania dhe Kosova janë të dyja krenare që e kanë Dua Lipën. Faleminderit Presidente Osmani për ftesën në ceremoninë speciale të dhënies së nënshtetësisë së Kosovës për Dua Lipën. Ishte nder të takoja Duan dhe të festoja një talent të tillë të përbashkët britaniko-kosovar,” ka shkruar ambasadori, duke theksuar se mezi pret ta shohë performancën e saj në mbrëmjen e së premtes në kuadër të Sunny Hill Festival.
Lipa, e cila e nisi këtë festival në Prishtinë më 2018, do të ngjitet për herë të tretë në skenën kryesore, tashmë të vendosur në një hapësirë të re e gjigante që përmbush të gjitha standardet e skenave botërore – me përmasa 62 metra gjerësi, mbi 30 metra thellësi dhe 18 metra lartësi.
Mundesh me e lexu edhe…
Pas një prezantimi të shkurtër më 2019 dhe spektaklit të vitit 2022 me turneun “Future Nostalgia”, rikthimi i saj këtë vit vjen në një edicion të veçantë ku performojnë edhe emra të njohur ndërkombëtarë si Shawn Mendes, Peggy Gou, Fatboy Slim, Skream, Headie One, Anyma, dhe shumë të tjerë, krahas artistëve vendorë.
Ambasada Britanike gjithashtu ka ftuar qytetarët të vizitojnë #BritishCorner në festival, duke theksuar rëndësinë e lidhjeve kulturore dhe bashkëpunimit mes dy vendeve.
