Prishtina përjetoi një mbrëmje të paharrueshme teksa Dua Lipa, ylli botëror i muzikës pop, ndezi skenën kryesore të “Sunny Hill Festival” me një performancë dyorëshe plot emocion, ritëm dhe ndriçim.
Nën tingujt e turneut të saj global “Radical Optimism”, Lipa u ngjit në skenë e shoqëruar nga ekipi i saj, duke elektrizuar mbi 30 mijë spektatorë që kishin mbushur Bërnicën e Poshtme për ta parë nga afër.
“Faleminderit për energjinë dhe natën e mrekullueshme”, u shpreh këngëtarja mes ovacioneve të publikut, duke përmbyllur performancën me këngën “Houdini”, e ndjekur nga një shpërthim spektakolar fishekzjarresh.
Pas interpretimit të “Be the One”, ajo fillimisht u përshëndet me publikun, por dashuria e madhe nga skena e riktheu sërish për një bis të fuqishëm. Koreografitë e sinkronizuara, dritat që ndërronin ritmin me beat-et dhe energjia shpërthyese e audiencës krijuan një atmosferë që “prekte qiellin”.
Një nga momentet më të veçanta të mbrëmjes ishte kur Dua ftoi në skenë babain e saj, Dukagjin Lipa, për të kënduar së bashku këngën “Era” – një hit nostalgjik që ngjalli emocion të madh mes të pranishmëve. Gjatë këtij momenti, artistja e njohur këndoi edhe shqip, duke theksuar lidhjen e saj të thellë me rrënjët.
“Tash na bëhen gjashtë vjet dhe po më duket çdo vit po bëhet mirë e më mirë”, tha Dua duke iu referuar suksesit në rritje të festivalit të krijuar nga familja Lipa.
Ajo përfundoi me një mesazh të ngrohtë për vendin e saj: “Kosova ka lezet”
Me këtë natë të paharrueshme, Prishtina jo vetëm që u bë pjesë e një turneu botëror, por edhe një epiqendër e emocioneve dhe krenarisë kulturore që kaloi përtej kufijve./Katror.info
