Fondacioni Gates do të shpenzojë 2.5 miliardë dollarë deri në vitin 2030 për shëndetin e grave, njoftoi të hënën, me themeluesin Bill Gates i cili tha se kjo fushë, që përfshin gjendje nga preeklampsia te menopauza, është neglizhuar për shumë kohë, shkruan Reuters, përcjell Katror.info.
Ky investim është ndër angazhimet e para të mëdha të fondacionit që kur Gates njoftoi më herët këtë vit se do të dhurojë pasurinë e tij prej 200 miliardë dollarësh deri në vitin 2045. Investimi gjithashtu është rreth një e treta më i madhe se sa ka shpenzuar fondacioni për kërkim dhe zhvillim në shëndetin e grave dhe të nënave gjatë pesë viteve të fundit.
“Shëndeti i grave vazhdon të anashkalohet, të nënfinancohet dhe të lihet mënjanë. Shumë gra ende vdesin nga shkaqe të parandalueshme ose jetojnë me shëndet të dobët,” tha Gates në një deklaratë. “Kjo duhet të ndryshojë.” Puna do të fokusohet në fusha shumë pak të studiuara që prekin qindra miliona gra si në vendet me të ardhura të larta ashtu edhe në ato me të ardhura të ulëta, nga preeklampsia dhe diabeti gestacional te gjakderdhja e rëndë menstruale, endometrioza dhe menopauza.
Mundesh me e lexu edhe…
Investimi do të përqendrohet në pesë fusha kyçe: kujdesi obstetrik dhe imunizimi maternal; shëndeti dhe ushqyerja e nënës; shëndeti gjinekologjik dhe menstrual; inovacioni në kontraceptivë; dhe infeksionet seksualisht të transmetueshme.
Qëllimi është të nxisë kërkimin, të zhvillojë produkte dhe të sigurojë qasje të barabartë në to në mbarë botën. Udhëheqësja e fondacionit për barazi gjinore, Dr. Anita Zaidi, tha se kjo fushë është penguar pjesërisht për shkak të paragjykimeve dhe mungesës së të dhënave për çështje kyçe, si për shembull mënyra se si ilaçet kalojnë në mitër. “Nëse shikon literaturën, mund të jenë vetëm 10 gra që janë studiuar ndonjëherë,” i tha ajo Reuters. “As nuk kemi përgjigje për këto pyetje bazike.”
Vetëm 1% e shpenzimeve për kërkime dhe inovacion në kujdesin shëndetësor janë dedikuar për gjendje specifike të grave përtej kancerit, sipas një analize të vitit 2021 nga McKinsey & Co.
Zaidi pranoi se 2.5 miliardë dollarët janë “një pikë në oqean” krahasuar me nevojat dhe u bëri thirrje të tjerëve të përfshihen, përfshirë sektorin privat, filantropët dhe qeveritë.
Ish-bashkëshortja e Gates, filantropistja Melinda French Gates, gjithashtu ka investuar në shëndetin e grave që nga largimi i saj nga fondacioni vitin e kaluar./Katror.info
