Në kuadër të festivalit ndërkombëtar të filmit dokumentar dhe të shkurtër, “DokuFest”, një hapësirë e veçantë u dedikohet më të vegjëlve.
DokuKids, me aktivitete kreative, edukative dhe argëtuese synon t`i frymëzojë fëmijët përmes filmit, artit dhe lojës, duke u dhënë atyre mundësinë të shprehin vetveten dhe të mësojnë në mënyrë argëtuese. Gjatë ditëve të festivalit, DokuKids kthehet në një botë ngjyrash, ideve dhe imagjinatës, ku fëmijët janë në qendër të vëmendjes.
Dokukids, pjesë e pandashme e festivalit ndërkombëtar Dokufest në Prizren, sjell çdo vit një gamë të gjerë aktivitetesh kreative, edukative dhe argëtuese për fëmijët. Kjo platformë synon të nxisë mendimin kritik, kreativ dhe dashurinë për filmin dhe artin që në moshë të hershme, e fëmijët shprehen të kënaqur më pjesëmarrjen në këto aktivitete.
Mundesh me e lexu edhe…
“Këtu luajmë, i kemi gjashtë punëtori, Fëmijët munden edhe të bëjnë filma dhe mund të luajnë .Nga ora dhjetë deri në ora tre është orari dhe në ora dhjetë deri në ora 12 shikojmë filma “, tha Bora Godeni.
“Kemi luajtur lojëra, kemi shikuar filma dhe kemi qenë në punëtori dhe kemi kaluar shumë mirë. Aty edhe kemi bërë edhe filma dhe jemi kënaq “, tha Buna Haxholli.
” Më shumë më ka pëlqyer një film për një vajzë. Ajo ka qenë emigrante dhe ajo kështu e ka plotësuar ëndrrën sepse ajo ka pasur dëshirë me qenë këngëtare dhe balerinë por familja e saj nuk e lejojnë pastaj ajo me një shfaqje e shprehë talentin e saj”, tha Klesta Lezi.
Prindërit konsiderojnë që kjo pjesë e Dokufestit është sa argëtuese, aq edhe edukative.
“Më duket mirë dhe edukativë fëmijët e kalojnë një kohë të bukur këtu sidomos larg përditshmërisë që e kanë në shtëpi. Më pëlqen është ide e mirë ” tha Hysein Gashi, prind.
Dokukids tashmë ka realizuar punëtori artistike dhe kreative, shikim filmash lojëra dhe improvizime të ndryshme.
“Programi jonë është njëjavor, pra fillon prej ditës së dytë të festivalit dhe mbaron në ditën e para fundit të festivalit. Pra për një javë e kemi një program shumë të pasur që enkas e kurojmë për fëmijët”, tha Malborja Krajku, kuratore dhe kordinatore e ” DokuKids”.
DokuKids është një hapësirë ku krijimtaria takohet me edukimin, një vend ku fëmijët janë protagonistë të së tashmes dhe së ardhmes./Katror.info
