Ministri në detyrë i Mbrojtjes, Ejup Maqedonci, ka thënë se është thelluar dhe zgjeruar bashkëpunimi në fushën e sigurisë dhe mbrojtjes në mes të Kosovës dhe Shteteve të Bashkuara të Amerikës (SHBA-së).
Ai në një intervistë në “Euronews Albania” ka dhënë hollësi mbi marrëveshjen e parë kornizë të mbrojtjes në mes të Kosovës dhe ShBA-së.
“Kemi thellim dhe zgjerim të raporteve me ShBA-në, veçanërisht në fushën e mbrojtjes dhe të sigurisë. Që nga koha kur e kam marrë detyrën e ministrit, para dy viteve, kam pasur tri vizita në Departamentin e Mbrojtjes. Gjatë vizitës së fundit, së bashku me asistentsekretarin e Mbrojtjes, jemi dakorduar për rrugën e bashkëpunimit midis vendeve tona në fushën e mbrojtjes. Konkretisht, kemi rënë dakord për të punojmë bashkërisht për implementimin e disa pikave, që Kosova të jetë e vetëqëndrueshme në aspektin e mbrojtjes dhe në të ardhmen të ketë kapacitete të afta për ta mbrojtur territorin dhe jetën e qytetarëve të saj”, ka thënë Maqedonci.
Mundesh me e lexu edhe…
Po ashtu, ai ka treguar se “jemi dakorduar për trajnime dhe stërvitje të përbashkëta, si dhe për pjesëmarrje në misione në vende të huaja, si ajo që kemi bërë në Kuvajt”.
“Po ashtu, kemi dy pika të veçanta: industrinë e mbrojtjes dhe një rritje të bashkëpunimit për përgatitjen e shoqërisë për të reaguar dhe për t’i mbështetur institucionet e sigurisë për ta mbajtur qëndrueshmërinë në rast lufte. Do të kemi një fabrikë shtetërore ushtarake. Së fundmi kemi pasur një takim në Prishtinë për sinkronizimin e investitorëve ushtarakë amerikanë me kompanitë tona ku, përveç sektorit publik, po punojmë edhe me sektorin ushtarak privat amerikan, që është një nga prioritetet e kryeministrit dhe për mua personalisht, për të fokusuar këtë industri jo vetëm për vendin, por edhe për eksport”, tregoi Maqedonci.
Ai theksoi se bashkëpunimi me aleatët është i fuqishëm, duke pasur një ekip këshillues të NATO-s, i drejtuar nga një gjeneral gjerman, që mbështet ministrinë dhe Forcën e Sigurisë së Kosovës për objektivat dhe afrimin me NATO-n.
“ShBA ka stacionuar trupa në Kosovë, jashtë mandatit të KFOR-it, që kanë për qëllim bashkëpunimin bilateral dhe mbështetjen në trajnime. Ushtria e ShBA-së na mbështet edhe me donacione. Kemi ndërtuar një prej poligoneve më të mira për qitje me armë të lehta, që ka kushtuar dy milionë euro. Gjithashtu, kemi pranuar një kontingjent automjetesh të blinduara, të cilat janë blerë me një shumë simbolike”, ka thënë ai.
Sa i përket ecurisë drejt anëtarësimit në NATO, Maqedonci ka bërë me dije se janë duke bërë përpjekje për anëtarësim të plotë në NATO. “Kosova ka ndërtuar kapacitete ushtarake nga fillimi dhe NATO ka qenë ajo që ka mbështetur krijimin e këtyre kapaciteteve”, ka shtuar ai./RTK/Katror.info
