Ministria e Punëve të Jashtme dhe Diasporës (MPJD) organizoi sot edicionin e 8-të të Konferencës së Ambasadorëve të Republikës së Kosovës, një ngjarje vjetore e rëndësishme që mblodhi përfaqësuesit diplomatikë nga e gjithë bota për të reflektuar mbi punën e bërë, për të vlerësuar rezultatet dhe për të përcaktuar prioritetet për vitin e ardhshëm, shkruan Katror.info.
Në ceremoninë e hapjes morën pjesë Kryeministri në detyrë i Kosovës, z. Albin Kurti, Zëvendëskryeministrja dhe Ministrja në detyrë e Punëve të Jashtme dhe Diasporës, znj. Donika Gërvalla, ministra, zëvendësministra, shefa të misioneve diplomatike dhe përfaqësues të tjerë institucionalë.
Në fjalën e tij përshëndetëse, Kryeministri Kurti theksoi se rrjeti diplomatik i Kosovës është zgjeruar më shumë se kurrë në historinë e saj, duke përfshirë 53 përfaqësi në gjashtë kontinente. Ai nënvizoi rëndësinë e bashkërendimit të punës së ambasadave dhe konsullatave me Ministrinë e Punëve të Jashtme dhe Diasporës, për të përfaqësuar interesat e vendit me një zë të unifikuar. Duke u ndalur tek sfidat globale dhe rajonale, përfshirë agresionin rus në Ukrainë dhe përpjekjet e Serbisë për të minuar sovranitetin e Kosovës, Kryeministri Kurti theksoi se diplomacia kosovare duhet të jetë aktive, duke luftuar propagandën me promovim të vazhdueshëm të arritjeve të vendit. Ai vuri në dukje se, pavarësisht mjeteve më të mëdha financiare për lobim që ka Serbia, Kosova ka një kauzë të drejtë dhe përkushtim të palëkundur për paqe dhe siguri, vlera këto që nuk mund të blihen.
Mundesh me e lexu edhe…
Nga ana e saj, Ministrja në detyrë Donika Gërvalla përshëndeti angazhimin e misioneve diplomatike të Kosovës dhe prezantoi reformat thelbësore që MPJD ka ndërmarrë gjatë vitit të fundit, duke vendosur standarde të reja transparence dhe menaxhimi financiar, si në ministri, ashtu edhe në misionet diplomatike. Ajo theksoi se “Kosova sot flet me një zë më të fortë në botë”, duke përmendur përmirësimet në shërbimet konsullore, dixhitalizimin e procedurave dhe përzgjedhjen e stafit mbi bazën e meritokracisë.
Ministrja Gërvalla theksoi gjithashtu rëndësinë e forcimit të diplomacisë ekonomike dhe publike, duke mbështetur bizneset kosovare në tregjet ndërkombëtare dhe promovuar imazhin e Kosovës jashtë vendit. Ajo përmendi arritjen e dy njohjeve të reja të shtetësisë dhe anëtarësimin e Kosovës në disa organizata ndërkombëtare si dëshmi të suksesit të punës diplomatike.
Duke iu referuar situatës gjeopolitike, znj. Gërvalla e përshkroi Kosovën si një pjesë të palëkundur të kampit të demokracive me orientim euroatlantik dhe nënvizoi nevojën për unitet të brendshëm dhe veprim proaktiv në arenën ndërkombëtare. Ajo paralajmëroi për rrezikun që paraqet Serbia, e cila sipas saj financon dhe udhëheq struktura ilegale në veri dhe punon për të minuar subjektivitetin ndërkombëtar të Kosovës. “Ne i kundërvihemi me vendosmëri dhe së bashku me aleatët tanë do të sigurojmë që kërcënimet e saj të mos shndërrohen kurrë në realitet,” tha Ministrja.
Konferenca e 8-të e Ambasadorëve do të vijojë punimet përgjatë tri ditëve me sesione të dedikuara për planifikimin strategjik të politikës së jashtme dhe forcimin e rolit të Kosovës në arenën ndërkombëtare. Në fokus do të jetë forcimi i pozitës ndërkombëtare të vendit dhe mbrojtja e interesave kombëtare në çdo forum global./Katror.info
