Ministria e Arsimit ka njoftuar hapjen e aplikimeve për afatin e dytë të Provimit të Maturës Shtetërore, i cili do të mbahet pas përfundimit të procesit të paraqitjeve online në platformën eKosova, shkruan Katror.info.
Afati i parë i provimit u zhvillua më 27 maj 2025, ndërsa maturantët që nuk arritën pragun e kalueshmërisë prej 40% të totalit të pikëve të mundshme, apo ata që nuk morën pjesë në testim, kanë mundësinë të paraqiten për afatin e dytë. Vetëm kandidatët që e arrijnë këtë prag mund të aplikojnë më pas për regjistrim në institucionet e arsimit të lartë në Kosovë.
Aplikimi online për afatin e dytë është i hapur nga 13 deri më 22 gusht 2025 në linkun ekosova.rks-gov.net/505. Kjo është hera e dytë që procesi i paraqitjes bëhet vetëm përmes platformës elektronike eKosova, duke e zëvendësuar paraqitjen fizike në shkolla.
Mundesh me e lexu edhe…
Për të aplikuar, kandidatët duhet të:
- Identifikohen në platformën eKosova;
- Klikojnë te “Shërbime”;
- Zgjedhin “Arsimi”;
- Klikojnë mbi “Apliko për paraqitje të provimit të maturës – Afati i dytë”;
- Plotësojnë të dhënat e kërkuara, përfshirë komunën, shkollën, drejtimin e studimit dhe lëndën zgjedhore.
Në provim, maturantët i nënshtrohen katër lëndëve – tre të detyrueshme: Gjuha shqipe, Matematika dhe Gjuha angleze, ndërsa e katërta është me zgjedhje nga lista e lëndëve të tjera të ofruara. Çdo lëndë përmban nga 25 pyetje me alternativa.
Udhëzime për ditën e testimit:
Kandidatët duhet të kenë me vete dokument zyrtar identifikimi ose dokument të lëshuar nga shkolla me foto dhe vulë;
Të përdorin laps grafit HB, pasi fletë-përgjigjet lexohen nga lexuesi optik;
Ndalohet marrja me vete e telefonave apo pajisjeve të tjera elektronike;
Kandidatët me nevoja të veçanta duhet ta njoftojnë shkollën gjatë paraqitjes së provimit për të siguruar ndihmën e nevojshme;
Rekomandohet që kandidatët të marrin ujë dhe të jenë të pushuar mjaftueshëm para testit.
Platforma eKosova ka lehtësuar ndjeshëm procedurat, duke i mundësuar maturantëve të përfundojnë aplikimin plotësisht online dhe duke i ndihmuar institucionet arsimore të organizojnë më mirë procesin e testimit./Katror.info
