Goli i shënuar nga Veton Tusha ngjalli entuziazëm te rreth 10 mijë shikues në “Fadil Vokrri”. Por, goli i shënuar në minutën e 52-të dhe përkrahja nga tribunat ishin të pamjaftueshme për kampionen e Kosovës, Drita. Skuadra e drejtuar nga trajneri shkupjan, Zekirija Ramadani, pësoi humbjen e dytë nga kampioni i Rumanisë, FCSB.
Të enjten në Prishtinë, Drita pësoi 3:1, kurse javën e kaluar në Bukuresht humbi 3:2.
Megjithatë, rrugëtimi i gjilanasve në garat evropiane nuk është mbyllur. Drita do të paraqitet në plejofin e Ligës së Konferencës, garës së tretë të UEFA-s për nga rëndësia.
Mundesh me e lexu edhe…
Golashënuesi i vetëm i Dritës në ndeshjen e dytë ndaj FCSB-së, Veton Tusha, është shprehur i zhgënjyer pas humbjes 3:1.
“Rezultat shumë zhgënjyes. E nisëm shumë keq duke pësuar në minutën e parë. Ndoshta ishte kjo pakujdesia jonë. Kjo ndikoi në rezultatin që të humbim ndeshjen”, ka thënë ai për KTV-në pas ndeshjes.
Megjithatë, ai shpreson ta eliminojë për herë të dytë Differdangen e Luksemburgut. E kishte eliminuar edhe në raundin e parë kualifikues të Ligës së Kampionëve.
“Shpresojmë të kemi paraqitje sa më të mirë. E di që i kemi mposhtur një herë dhe uroj që prapë të ndodhë kjo”, ka thënë ai.
Që në sekondën e 24-t, FCSB-ja shënoi për 1:0. Valentin Cretu harkoi nga krahu i djathtë, ndërsa Juri Cisotti pas gjuajtjes me kokë e mposhti portierin Faton Maloku.
Në minutën e katërt FCSB-ja rrezikoi sërish. David Miculescu tentoi nga distanca, por nuk ishte i saktë.
Vesel Limaj i Dritës e dërgoi gjuajtjen e parë në drejtim të portës së FCSB-së. Ai tentoi nga distanca, por gjuajtja ishte qendrore.
Në minutën e 17-të, FCSB-ja shënoi sërish. Raddy Ovouka nuk e largoi topin në afërsi të zonës, ndërsa sulmuesin Daniel Birligea nuk e pengoi as Egzon Bejtullai. Birligea pasoi për Miculescun i cili me gjuajtje të fuqishme e të saktë e mposhti Malokun për herën e dytë.
Edhe një tjetër mundësi mysafirët patën në minutën e parë shtesë të pjesës së parë. Megjithatë, tentimin e Vlad Chiriches e bllokoi kapiteni Rron Broja.
Drita arriti ta shënonte golin e vetëm në ndeshje në minutën e 52-të. Liridon Balaj mirë u shmang nga krahu i djathtë dhe harkoi në zonë, duke e gjetur të lirë Veton Tushën. Tusha, që shënoi edhe në ndeshjen e parë në Bukuresht në humbjen 3:2, ishte i pagabueshëm përballë portierit Stefan Tarnovanu për 2:1.
Drita ishte afër ta barazonte rezultatin, por dy sulmuesit Arb Manaj dhe Blerim Krasniqi nuk u kuptuan mirë në zonë në momentin vendimtar. Në fund, Manaj nuk ishte i saktë në minutën e 63-të.
Në minutën e 68-të kapiteni Rron Broja u ndëshkua direkt me të kuq pas ndërhyrjes në kapitenin e FCSB-së, zëvendësuesin Darius Olaru.
Epërsinë numerike të lojtarëve e shfrytëzuan mysafirët që shënuan tjetër gol në minutën e 85-të. Zëvendësuesi tjetër Dennis Politic u shmang mirë nga Bejtullai dhe me gjuajtje të fuqishme zhargas realizoi për 3:1.
Ky gol edhe e vendosi sfidën.
Për Dritën, megjithatë, nuk mbarojnë kualifikimet evropiane. Drita do të zhvendoset në plejofin e Ligës së Konferencës ku do të ballafaqohet sërish me Differdangen e Luksemburgut.
Differdangen e kishte eliminuar në rrethin e parë të Ligës së Kampionëve. Kishte fituar 1:0 në shtëpi dhe 3:2 në udhëtim.
Differdange e eliminoi të enjten mbrëma skuadrën e Levadias së Estonisë. Në ndeshjen e parë, Differdange u mposht 3:2, ndërsa në udhëtim fitoi 3:1, pas vazhdimeve.
Ndeshja e parë luhet më 21 gusht, ndërsa ajo kthyese pas një jave. Ndërkohë FCSB-ja avancon në plejofin e Ligës së Konferencës, ndaj skuadrës skoceze Aberdeen.
Drita pasi e kishte kaluar Differndagen në rrethin e parë kualifikues të Championsit, ishte eliminuar nga Copenhageni 3:0 me rezultat të përgjithshëm. Më pas u eliminua nga FCSB-ja rumune në rrethin e tretë kualifikues të Ligës së Evropës. Tani synohet faza e ligës, në Ligën e Konferencës.
Drita edhe në edicionin e kaluar luajti në plejofin e Ligës së Konferencës. Por, u eliminua nga Legia e Varshavës me rezultatin e përgjithshëm, 3:0./Katror.info
