Europe House Kosova ka shpallur hapjen e nominimeve për Çmimet e Vullnetarizmit 2025, të cilat do të ndajnë mirënjohje për ata që kontribuojnë në mënyrë të jashtëzakonshme në komunitet pa pritur shpërblim, shkruan Katror.info.
Ky vlerësim synon të nderojë individët, organizatat, komunat dhe bizneset që me punën e tyre të përditshme ndihmojnë të moshuarit, edukojnë fëmijët, mbrojnë mjedisin dhe përkrahin grupet e margjinalizuara. Në total, do të ndahen nëntë çmime të veçanta për ata që lënë gjurmë të qëndrueshme në shoqëri.
“Të nominosh një mik, koleg apo institucion është mënyra më e mirë për të treguar mirënjohje ndaj atyre që punojnë në heshtje, por bëjnë ndryshimin e madh”, thuhet në njoftimin e Europe House Kosova.
Mundesh me e lexu edhe…
Të gjithë të interesuarit mund të nominojnë veten apo të tjerët deri në afatin e përcaktuar, përmes faqes zyrtare të organizatës TOKA: toka-ks.org.
Çmimet e Vullnetarizmit janë bërë tashmë një traditë që synon të promovojë kulturën e solidaritetit dhe të forcojë rolin e vullnetarëve si zemra e shoqërisë./Katror.info
