“Ka nisur si hobi dhe tani më është bërë profesion, e dikur stil jete. Kam nisur kur nuk ka pasur as trepikësh, as semaforë, as kosh me faul. Kam vazhduar në ligat e një shteti që sot as nuk ekziston, dhe në ligat e një shteti që po e themelonim vetë, pa ditur kur ajo ëndërr do të realizohej. Kam luajtur në beton, në sallat e sporteve, në palestrat e shkollave fillore, kam transmetuar Ligën e Kosovës nga sallat e ftohta me telefon statik për radio. Kam transmetuar NBA-n dhe Lojërat Olimpike” – rrëfen Blerim Vuniqi, ish-basketbollist dhe gazetar sportiv me përvojë të gjatë në Kosovë.
Në të njëjtin dokumentar, vjen edhe rrëfimi i Mithat Belegut, një prej figurave më të rëndësishme të basketbollit kosovar.
“Së pari kam filluar me futboll, edhe kam qenë talent i jashtëzakonshëm. Isha shumë i mirë në futboll, por fusha e futbollit dhe ajo e basketbollit ishin afër njëra-tjetrës. Kështu që, njëkohësisht, edhe për shkak të gjendjes jo të mirë materiale, nuk kisha mundësi të dilja në qytet nëpër pastiçeri, siç shkonin zakonisht atëherë, por e kaloja kohën te këto dy fusha.
Mundesh me e lexu edhe…
Luaja pak futboll, pak basketboll, por futbolli ma ftohti nana ngaqë nuk i pëlqente. Atëherë fusha kishte bar natyral, por gjysma e saj ishte me baltë. Kur binte shi, bëhej baltë e madhe. Çorapet më bëheshin me baltë, më shkyheshin, dhe shkoja ashtu në shtëpi. Kur i shihte nëna, më jepte një dajak të mirë — s’kishte faj e shkreta, sepse me dorë më mbaronte të gjitha punët.”
Mithat Belegu ishte një nga figurat kryesore të basketbollit në Kosovë gjatë viteve 1960–70. Ai njihet fillimisht si lojtar i talentuar për Budućnostin e Pejës, ku shquhej si një nga pikat kyçe të ekipit. Në vitet ’60 konsiderohej gjerësisht si një nga lojtarët më të mirë në Kosovë.
Ky rrëfim vjen në kuadër të dokumentarit “4 Çerekët – Episodi 1”, i cili sjell për herë të parë historinë e basketbollit kosovar. Dokumentari, me autor dhe producent Leart Hoxha dhe intervista të realizuara nga Blerim Vuniqi, është prodhim i Katror Media dhe mbështetet nga Ministria e Kulturës, Rinisë dhe Sportit.
“4 Çerekët” është i strukturuar në katër episode, një ndarje simbolike që pasqyron formatin e një ndeshjeje basketbolli, duke lidhur dramatikën e lojës me historinë reale të sportit në vend./Katror.info
