Singapore është bërë një shembull botëror për përdorimin strategjik të gjelbërimit dhe hijeve në qytet, duke treguar se si urbanizimi mund të shoqërohet me komfortin klimatik.
Për t’iu përgjigjur problemit, Singapore ka investuar në një infrastrukturë të gjerë hijeje – nga trotuaret e mbuluara, të njohura si “five-foot ways”, tek pemët me kurora të gjera dhe strukturat artificiale të gjelbërimit, si supertrees në Gardens by the Bay.
Kjo traditë filloi me Stamford Raffles në shekullin XIX dhe u rivendos në formën moderne nga kryeministri Lee Kuan Yew në vitet 1960-1970.
Mundesh me e lexu edhe…
Lee vendosi që çdo hapësirë publike dhe ndërtesë private të kontribuonte në rrjetin e hijeve, duke përdorur pemë, çadra, markiza dhe vetë hijen e ndërtesave për të ftohur zonat e qarkullimit të këmbësorëve.
Autoritetet raportojnë rritjen e pyjeve urbane nga 158,600 pemë në vitin 1974 në 1.4 milion pemë në vitin 2014, ndërkohë që popullsia u rrit me tre milion banorë.
Tani, pothuajse gjysma e ishullit është e mbuluar me bar, shkurre dhe pemë me kurora të gjera, duke treguar se hapësirat natyrore mund të mbijetojnë edhe në qytetet që rriten shpejt.
Ekspertët theksojnë se hija dhe gjelbërimi nuk do të eliminojnë të gjitha efektet e ndryshimit të klimës, por ato ofrojnë mbrojtje të konsiderueshme ndaj nxehtësisë urbane dhe përmirësojnë jetën e banorëve.
Përveç kësaj, Singapore tregon se me planifikim të qëllimshëm dhe mbështetje politike, edhe qytetet tropikale të tjera mund të krijojnë një ambient më të ftohtë dhe më të këndshëm për të gjithë./AP/Katror.info
