Kryeministri në detyrë, Albin Kurti, është takuar me kongresistin amerikan Mike Lawler, me të cilin ka diskutuar mënyrat për të thelluar partneritetin mes Kosovës dhe Shteteve të Bashkuara të Amerikës.
Lajmin e ka bërë të ditur Zyra e Kryeministrit përmes një komunikate për media.
“Diskutuan mënyrat për të thelluar partneritetin ndërmjet Kosovës dhe Shteteve të Bashkuara të Amerikës, me theks të veçantë te bashkëpunimi ekonomik, investimet e huaja direkte dhe shkëmbimet tregtare, si dhe për rolin e rëndësishëm të diasporës sonë në këtë drejtim. Kryeministri Kurti e njoftoi kongresistin për zhvillimet e fundit në vend dhe për progresin e arritur vitet e fundit në ekonomi, demokraci, siguri dhe sundimin e ligjit”, thuhet në komunikatë.
Mundesh me e lexu edhe…
Ndër të tjera, Kurti ka shprehur mirënjohje për rolin historik dhe aktiv të ShBA-ve ndaj Kosovës.
“Jemi gjithmonë falënderues e mirënjohës për rolin historik dhe aktiv të Shteteve të Bashkuara të Amerikës për vendin tonë dhe për mbështetjen dypartiake ndaj shtetit të Kosovës. Me kongresistin amerikan George Latimer u pajtuam që të vazhdojmë të punojmë së bashku për të promovuar vlerat dhe interesat e përbashkëta të dy shteteve tona”.
Çështje diskutimi mes Kurtit dhe Lawler kanë qenë edhe rreziqet dhe sfidat e ndikimit rus në Evropë dhe në Ballkanin Perëndimor.
Po ashtu, kongresisti Lawler, në këtë takim, e informoi Kurtin për vendimin e tij për t’u bashkuar Kaukusit të Çështjeve Shqiptare në Kongresin Amerikan.
Kurti është duke qëndruar për vizitë zyrtare në Shtetet e Bashkuara të Amerikës (ShBA). Marrëdhëniet mes Prishtinës dhe Uashingtonit janë dobësuar ndjeshëm kohët e fundit, kryesisht për shkak të bindjes së administratës amerikane se kryeministri në detyrë, Albin Kurti, nuk ka treguar gatishmëri për bashkëpunim dhe koordinim, pavarësisht thirrjeve, rekomandimeve dhe përkushtimit ndaj Kosovës.
Për këtë arsye, dy javë më parë ambasada e ShBA-së në Prishtinë njoftoi se dialogu strategjik me Kosovën është pezulluar./Albanian Post/Katror.info
