Bad Bunny është zyrtarisht i përzgjedhuri për të performuar në shfaqjen e shumëpritur të Super Bowl LX, që do të mbahet më 8 shkurt 2026 në Levi’s Stadium, Santa Clara, Kaliforni. Lajmi u bë i ditur të dielën mbrëma, gjatë ndeshjes mes Dallas Cowboys dhe Green Bay Packers, me një paralajmërim paraprak nga NFL në rrjetet sociale.
Reperi 31-vjeçar, me emrin e lindjes Benito Antonio Martínez Ocasio, e shoqëroi lajmin me një video në Instagram ku shihej ulur mbi një shtyllë futbolli në plazh, me një perëndim ngjyrash të ndezura në sfond. Teksti në ekran konfirmonte: ai do të jetë fytyra e Apple Music Halftime Show 2026.
Në një postim në X, Bad Bunny la të kuptohej se ky do të jetë një nga momentet e rralla të tij në skenën amerikane, duke iu referuar vendimit për të mos zhvilluar turne në SHBA gjatë turit të fundit botëror, për shkak të politikave të Presidentit Trump mbi emigracionin dhe përdorimin e ICE. “Kam menduar shumë ditët e fundit dhe, pas diskutimeve me ekipin tim, vendosa të bëj vetëm një datë në SHBA,” shkroi ai.
Mundesh me e lexu edhe...
Jay-Z, i cili prej vitit 2019 është bashkëpunëtor i NFL-së si strateg i performancave live, e përshkroi përzgjedhjen si historike: “Ajo që Benito ka bërë dhe vazhdon të bëjë për Puerto Rico është frymëzuese. Është një nder ta kemi në skenën më të madhe të botës.”
Vetë Bad Bunny e pa këtë moment si më shumë se një arritje personale: “Ajo që ndjej shkon përtej vetes sime. Është për ata që erdhën para meje dhe vrapuan kilometra që unë të mund të shënoj një ‘touchdown’. Kjo është për njerëzit e mi, kulturën tonë dhe historinë tonë.”
Performanca e tij do të pasojë setin historik të Kendrick Lamar në vitin 2024, që solli në skenë emra si SZA, Samuel L. Jackson, Serena Williams dhe Mustard, dhe që u bë shfaqja më e ndjekur ndonjëherë në historinë e Super Bowl. Më parë, Rihanna (2023) dhe Usher (2024) kishin mbajtur të gjallë traditën e spektaklit muzikor të këtij eventi.
Komisioneri i NFL, Roger Goodell, ndërkohë, la të hapur edhe mundësinë e një dite të ardhshme për Taylor Swift në këtë skenë, duke e quajtur atë “një talent të jashtëzakonshëm që do të ishte gjithmonë i mirëpritur.”
Super Bowl LX, përveç përballjes së dy ekipeve më të mirë të ligës, pritet të shndërrohet në një moment kulturor të rëndësishëm për fansat e Bad Bunny-t dhe muzikës latine në mbarë botën./Albanian Post/Katror.info
