Komisioni Evropian ka nisur një konsultim publik mbi të ashtuquajturin “Digital Omnibus”, pjesë e Paketës Digjitale të Thjeshtimit, sipas “Newsweek”.
Ky proces do të pasohet nga një “Digital Fitness Check”, i cili do të “testojë” koherencën dhe ndikimin e rregullave që formojnë kornizën digjitale të Bashkimit Evropian.
Konsultimi është i hapur për të gjithë qytetarët e BE-së deri më 14 tetor 2025 dhe bazohet mbi tre thirrje të mëparshme; strategjinë e bashkimit të të dhënave, rishikimin e aktit të sigurisë kibernetike dhe strategjinë për zbatimin e inteligjencës artificiale( IA).
Mundesh me e lexu edhe…
Deri më tani, këto iniciativa kanë mbledhur 718 përgjigje origjinale nga qytetarë, organizata dhe biznese.
Qëllimi i “ Digital Omnibus” është të identifikojë dhe të thjeshtojë fushat ku rregullat ekzistuese janë bërë të ndërlikuara, duke synuar një kuadër më të qartë dhe më funksional.
Sipas Komisionit, objektivi është të reduktohen kostot administrative për bizneset, duke ruajtur në të njëjtën kohë mbrojtjen e të dhënave dhe sigurinë.
Në dokumentin shpjegues theksohet se do të “eksplorohet më tej nevoja për masa thjeshtimi në fushën e rregullimit të të dhënave, për të nxitur disponueshmërinë dhe ndarjen e tyre”.
Por disa zëra kërkojnë më shumë guxim. Vetëm pak ditë më parë, Mario Draghi ekonomist dhe ish kryeministri I Iltalisë, bëri thirrje për një ”reformë të gjerë të GDPR-së” ,ligjit emblemë të BE-së për mbrojtjen e të dhënave, të cilin e quajti “elefantin rozë në dhomë”.
Sipas tij, kufizimi i këtij konsultimi vetëm në Aktin e Qeverisjes së të Dhënave dhe rregullat për të dhënat jo-personale nuk trajton problemin themelor; përkufizimin tepër të gjerë të të dhënave personale, interpretimet e ndryshme nga shtetet anëtare dhe ngurrimin për të ndarë të dhëna me startup-et evropiane nën justifikimin e përputhshmërisë me GDPR.
Për më tepër, ekziston frika e vazhdueshme se një qasje më e hapur ndaj ndarjes së të dhënave mund të çojë në “daljen e tyre në duar amerikane”. Sipas analistëve, kjo është një frikë e tepruar që mund të zgjidhet me mekanizma të qartë kontrolli dhe transparence. “Këto probleme janë të zgjidhshme dhe është koha të zgjidhen”, thuhet në analizën e “EU Tech Loop”.
Megjithatë, disa burokratë në Bruksel argumentojnë se reforma e GDPR-së nuk mund të përfshihet në këtë konsultim për arsye ligjore apo sepse çështja i përket një grupi tjetër pune.
Të tjerë thonë se aktualisht është presidenca daneze e bllokut evropian që po merret me temën dhe se çdo ndryshim do të kërkojë koordinim më të gjerë ndërinstitucional.
Por sipas ekspertëve të politikave digjitale, pikërisht për këtë ekzistojnë konsultimet ndër-shërbimore, fryma e “thjeshtimit” dhe “qeverisjes më të mire” që Komisioni pretendon të forcojë.
Për ta, kjo është mundësia e duhur për të parë më gjerë, përtej burokracisë dhe për të ndërtuar një kuadër të ri digjital që i shërben inovacionit, transparencës dhe konkurrueshmërisë evropiane. /atsh/Katror.info
