Ka shumë fshatra të bukur në Holandë, por Giethoorn është diçka vërtet speciale. I njohur në mbarë botën si “Venecia e Holandës” ose “fshati pa rrugë”, ai të bën të ndihesh sikur ke hyrë në një botë përrallore.
Atmosfera është aq e qetë dhe paqësore sa që të lind dëshira të qëndrosh gjatë dhe të harrosh gjithçka tjetër. Kanale të ngushta, shtëpi të vogla me çati kashte dhe kopshte të mbushura me lule shumëngjyrëshe, ku e vetmja zhurmë është ajo e rosakëve dhe e ujit që përplaset lehtë, krijojnë një pamje që nuk haset çdo ditë.
Në fillimet e tij, Giethoorn ka qenë vetëm një grumbull shtëpish të vogla të rrethuara nga kanale, të lidhura me ura druri. Sot ka rrugë që të çojnë deri në fshat dhe rrugica të zakonshme brenda tij, por pjesa e vjetër mbetet një rrjet kanalesh ku makinat nuk kanë vend. Pikërisht kjo pjesë është ajo që e bën fshatin unik.
Mundesh me e lexu edhe...
Çdo shtëpi është si një ishull i vogël, me një kopsht përreth të mbushur me lule dhe me varkën e familjes të lidhur në një dok të vogël. Giethoorn ka rreth 176 ura që lidhin ishujt e vegjël, por jo të gjitha janë të hapura për vizitorët.
Historia e fshatit daton nga viti 1225, ndërsa emri i tij lidhet me “brirët e dhive” që u gjetën pas një përmbytjeje të madhe. Kanaleve dhe liqeneve që e rrethojnë ua kanë dhënë formën gërmimet e torfës shekuj më parë.
Mënyra më e bukur për ta përjetuar Giethoorn është me varkë. Mund të marrësh një varkë me qira, të rezervosh një tur privat ose të ngjitesh në një prej barkave të mëdha turistike me guidë. Pas udhëtimit, shëtit përgjatë kanaleve, vizito muzetë, ndalo për kafe ose shijo një drekë tradicionale.
Një ndër muzeumet më të njohura është ’t Olde Maat Uus, ku mëson për jetën e banorëve mbi 100 vjet më parë, ndërsa De Oude Aarde të prezanton me gurë të çmuar dhe minerale. Për të përjetuar qetësinë e vërtetë, duhet të kalosh një natë aty.
Restorantet në Giethoorn ofrojnë kuzhina të ndryshme, nga ato tradicionale me petulla holandeze e deri tek ushqime ndërkombëtare. Megjithatë, bukuria e vendit shpesh mbizotëron mbi shijet e tavolinës.
Giethoorn është përballur edhe me problemin e mbituruizmit. Me më pak se 3 mijë banorë dhe mbi një milion vizitorë çdo vit, kontrasti është i madh. Popullariteti i tij nisi pas filmit “Fanfare” në vitin 1958 dhe sot turizmi është burimi kryesor i të ardhurave.
Fshati ndodhet mbi 100 kilometra në verilindje të Amsterdamit dhe mund të arrihet me makinë ose transport publik, me kombinim treni dhe autobusi. Për ata që nuk duan të merren me organizimin e udhëtimit, agjencitë ofrojnë ture ditore.
Përveç Giethoorn, zona përreth është e pasur me qytete historike si Zwolle, Kampen dhe Elburg, si edhe me Parkun Kombëtar Weerribben-Wieden, një parajsë për natyrëdashësit. /AP/Katror.info
