Në mbrëmjet e gjalla të fundjavës, tingujt e pirunëve dhe gotave në restorantin Epicurus ndërthuren me ritmin e një baterie dhe notat e një saksofoni. Pas sallës elegante me tavane të larta, ndodhet zemra e vërtetë e lokalit: një klub i fshehtë jazz, ku performojnë muzikantë nga e gjithë bota.
Ky vend i ri është simbol i një trashëgimie që e ka formuar Kopenhagën për gati një shekull.
Dikur një strehë për muzikantët amerikanë në kërkim të lirisë krijuese, sot kryeqyteti danez është shndërruar në një nga qendrat më dinamike të jazz-it në botë. Klubet e vjetra, lokalet moderne dhe festivalet në ajër të hapur e mbajnë muzikën gjallë çdo natë.
Mundesh me e lexu edhe…
Në panteonin e qyteteve të mëdha të jazz-it, New Orleans dhe New York janë në krye, ndjekur nga Parisi, Tokio dhe Londër. Por pak qytete evropiane e kanë lidhjen e thellë me këtë zhanër si Kopenhaga.
Në vitet 1950 dhe 1960, qyteti u bë strehë për muzikantët amerikanë, veçanërisht për artistët me ngjyrë që përballeshin me racizëm dhe pabarazinë ekonomike në SHBA.
Në mesin e tyre ishin Stan Getz, Dexter Gordon, Chet Baker, Quincy Jones dhe pianisti Kenny Drew, i cili sot prehet në varrezat e Kopenhagës.
Shumë prej tyre, ndjenin në Danimarkë një respekt që rrallë e përjetonin në atdhe. Kështu, arratisja u shndërrua në bashkëpunim mes kulturave. Muzikantët amerikanë luanin me danezët, i mësonin brezat e rinj dhe krijuan një komunitet që vazhdon të tërheqë talente nga e gjithë bota.
Rrënjët e xhazit në Danimarkë shtrihen edhe më herët. Gjatë pushtimit nazist, në fund të viteve ’30 dhe gjatë viteve ’40, Joseph Goebbels e quajti xhazin “muzikë degjeneruese”. Megjithatë, danezët e luanin fshehurazi në bodrume – një akt i vërtetë rezistence kulturore. Pas luftës, kjo lëvizje doli në dritë dhe lulëzoi.
Në vitin 1959, u hap Jazzhus Montmartre, një klub që u bë përgjigjja evropiane ndaj Village Vanguard të Nju Jorkut. Çdo natë mund të shihje Dexter Gordon në skenë, ndërsa Miles Davis dëgjonte nga turma.
Nga themelimi e deri në mbylljen e tij më 1995, ky klub priti disa prej emrave më të mëdhenj të muzikës botërore dhe shërbeu si terren trajnimi për talentet daneze.
Sot, qyteti e nderon këtë trashëgimi. Në lagjen Sluseholmen, shtatë rrugë mbajnë emrat e muzikantëve amerikanë që luajtën dhe jetuan këtu: Richard Boone, Kenny Drew, Dexter Gordon, Thad Jones, Oscar Pettiford, Ben Webster dhe Ernie Wilkins.
Për udhëtarët dhe dashamirët e muzikës, Kopenhaga ofron një skenë të gjallë jazz-i në çdo cep.
Copenhagen Jazz Festival, çdo korrik, sjell më shumë se 1,500 koncerte në 120 vende për vetëm 10 ditë, kurse4 Vinterjazz, në shkurt, e ngroh Danimarkën nga veriu në jug me mbi 600 koncerte në qytete si Aalborg, Aarhus dhe Kopenhagë. /AP/Katror.info
