Portreti i parë i shkrimtarit të madh Ismail Kadare është restauruar dhe zbulohet se është vepër e piktorit të njohur Vilson Kilica.
Restaurimi është kryer nga specialisti i Galerisë Kombëtare të Arteve, Olsi Laska, ndërsa identifikimi i autorit u bë nga studiuesja e artit Suzana Varvarica Kuka, raportojnë mediat në Shqipëri.
Piktura, e realizuar gjatë periudhës së studimeve të Kadaresë dhe Kilicës në Bashkimin Sovjetik, mendohet të jetë krijuar në vitin 1958.
Mundesh me e lexu edhe…
Kjo vepër shënon një moment të rëndësishëm kulturor, jo vetëm për lidhjen e hershme të shkrimtarit me artin pamor, por edhe për reflektimin e ndikimit rus që shoqëron një pjesë të veprës së tij letrare.
Drejtoresha e “Shtëpisë-Studio Kadare”, Anisa Ymeri, ka deklaruar se portreti ishte në gjendje të rënduar dhe rrezikonte shkatërrimin e plotë.
Procesi i studimit dhe restaurimit, i nisur në janar të këtij viti, ka bërë të mundur ruajtjen e një vepre me vlerë të jashtëzakonshme historike dhe artistike.
Pas restaurimit, portreti do të qëndrojë i ekspozuar në “Shtëpinë-Studio Kadare”, si pjesë e veprave të saj të përhershëm.
Ismail Kadare, lindur në Gjirokastër më 28 janar 1936 dhe ndarë nga jeta më 1 korrik 2024 në Tiranë, mbetet figura më e njohur e letërsisë shqiptare në arenën ndërkombëtare.
Veprat e tij janë përkthyer në mbi 40 gjuhë dhe ai është nderuar me dhjetëra çmime letrare kombëtare e ndërkombëtare./AP/Katror.info
