Në Prishtinë po mbahet Simpoziumi Ndërkombëtar Mjekësor, i organizuar nga Shoqata KOMC, që do të vazhdojë edhe nesër. Kryetarja e shoqatës, Dea Gjikolli Alaj, në një intervistë për emisionin “Mirëmëngjesi Kosovë” në RTK, theksoi se ky është simpoziumi i pestë që organizohet nga KOMC gjatë njëzet viteve të fundit.
“Gjatë këtyre viteve kemi tentuar të mbajmë simpoziume të tilla çdo disa vite, ku marrin pjesë profesionistë mjekësorë nga e gjithë bota. Ata fillimisht mbajnë ligjërata në Salzburg të Austrisë, e më pas kemi nderin t’i presim edhe këtu në Kosovë, në mënyrë që dijen dhe përvojën e tyre ta ndajnë me ne dhe me kolegët tanë”, tha Gjikolli Alaj.
Ajo shtoi se përveç profesionistëve nga Amerika dhe Evropa, në këtë ngjarje marrin pjesë edhe mjekë vendorë.
Mundesh me e lexu edhe…
“Sot kemi dy profesionistë ndërkombëtarë , një doktor nga SHBA dhe një doktoreshë nga Republika Çeke”, u shpreh ajo.
Sipas saj, këto simpoziume janë shumë të rëndësishme pasi ofrojnë mundësi për bashkëpunim profesional dhe shkëmbim të njohurive mbi qasjet më të reja që aplikohen në trajtimin e sëmundjeve të ndryshme.
“Temat janë të ndryshme, por në përgjithësi lidhen me radiologjinë, ndërsa nga këto prezantime do të përfitojnë të gjithë pjesëmarrësit, përfshirë edhe ata që do të prezantojnë nga radhët e mjekëve vendorë”, pohoi Gjikolli Alaj./RTK./Katror.info
