E përditësuar 15:32
Kuvendi i Kosovës ka votuar kundër formimit të qeverisë me kryeministër Glauk Konjufcën. Pro formimit të propozimit të Lëvizjes Vetëvendosje votuan vetëm 56 deputetë, 4 abstenuan dhe 53 ishin kundër.
Konjufca në prezantimin e tij kërkoi votë për të shmangur një palë zgjedhje të reja, teksa ka thënë se me urgjencë do të trajtonte buxhetin e shtetit. Ai doli para deputetëve për votim pa siguruar marrëveshje politike me ndonjë subjekt tjetër.
Mundesh me e lexu edhe...
Konjufca prezanton programin dhe kabinetin
Mandatari për kryeministër, Glauk Konjufca, ka prezantuar sot para deputetëve të Kuvendit të Kosovës kabinetin qeverisës me të cilin synon të qeverisë për katër vitet e ardhshme, duke bërë vetëm një ndryshim nga lista fillestare e propozuar nga Albin Kurti. Dimal Basha u zëvendësua me Besnik Bislimin në postin e ministrit të Infrastrukturës dhe Transportit.
Në prezantimin e tij, Konjufca paralajmëroi se vendi po përballet me “bllokadën më të rëndë institucionale të viteve të fundit”. Ai theksoi se që nga zgjedhjet e 9 shkurtit, Kosova nuk ka arritur t’i formojë institucionet e reja, duke e cilësuar këtë periudhë si një vit të humbur për shtetin.
“Për herë të parë, Kuvendi nuk arriti ta legjitimojë Qeverinë e shtetit. Votimit të 26 tetorit i parapriu një krizë politike për zgjedhjen e kryetarit të Kuvendit”, tha ai, duke shtuar se pa votimin e një qeverie të re “e vetmja gjë e sigurt është thellimi i krizës”.
Konjufca paralajmëroi se Kosova rrezikon të shkojë në dy palë zgjedhje brenda pak muajsh, çka sipas tij do të ishte e papërgjegjshme për vendin. “Me këtë Qeveri e kursejmë Kosovën nga dy palë zgjedhje eventuale. Nëse shkojmë në zgjedhje në dhjetor, kush na garanton që nuk do të kemi të tjera në mars?”, deklaroi ai.
Konjufca potencoi se prioritetet e Qeverisë së tij, nëse merr votëbesimin sot, do të jenë miratimi urgjent i buxhetit, zbatimi i Planit të Rritjes, ratifikimi i marrëveshjeve ndërkombëtare financiare, ekzekutimi i pagave dhe votimi i buxheteve komunale për Prishtinën, Gjilanin dhe Zubin Potokun.
Kabineti i propozuar nga Konjufca
- Zv. kryeministër i parë dhe ministër i Punëve të Jashtme dhe Diasporës – Albin Kurti
- Zv. kryeministre e dytë dhe ministre e Drejtësisë – Donika Gërvalla
- Zv. kryeministër i tretë për çështje të pakicave dhe bashkëpunim ekonomik – Fikrim Damka
- Ministër i Financave dhe Ekonomisë – Hekuran Murati
- Ministër për Familje dhe Mirëqenie Sociale – Andin Hoti
- Ministër i Mbrojtjes – Ejup Maqedonci
- Ministër i Punëve të Brendshme – Xhelal Sveçla
- Ministër i Administratës Publike dhe Digjitalizimit – Lulzon Jagxhiu
- Ministër i Shëndetësisë – Arben Vitia
- Ministër i Arsimit – Avni Zogiani
- Ministër i Kulturës dhe Turizmit – Fatmir Spahiu
- Ministër i Sportit dhe Rinisë – Blerim Gashani
- Ministër i Administrimit të Pushtetit Lokal – Rasim Demiri
- Ministre e Mjedisit dhe Planifikimit Hapësinor – Fitore Pacolli
- Ministër i Bujqësisë, Pylltarisë dhe Zhvillimit Rural – Armend Muja
- Ministër i Infrastrukturës dhe Transportit – Besnik Bislimi
- Ministre e Tregtisë, Industrisë dhe Integrimeve Evropiane – Mimoza Kusari-Lila
- Ministre e Energjisë dhe Minierave – Artane Rizvanolli
- Ministër për Komunitete dhe Kthim – Nenad Rashiq
- Ministër për Zhvillim Rajonal – Sejnur Vejshall
Votimi i kabinetit pritet të vendosë nëse Kosova do të hyjë në stabilizim institucional apo drejt një cikli të ri zgjedhor.
***
Deputetët e Kuvendit të Kosovës kanë nisur të hyjnë në sallën plenare, ku ishte paraparë që në orën 14:00 të niste seanca për zgjedhjen e re të Qeverisë së Kosovës.
Mandatari Glauk Konjufca pritet të paraqesë para deputetëve përbërjen e ekzekutivit të ri, por ende nuk dihet nëse ai do të arrijë të sigurojë 61 votat e nevojshme për zgjedhjen e Qeverisë.
LVV tenton formimin e Qeverisë me Glauk Konjufcën
Në orën 14:00 është planifikuar të mbahet seanca për formimin e Qeverisë së Kosovës, megjithatë e njëjta ende nuk ka filluar. Lëvizja Vetëvendosje (LVV) ka propozuar Glauk Konjufcën si mandatar të dytë për formimin e qeverisë.
Më herët, LVV ka tentuar ta formojë Qeverinë me mandatarin Albin Kurti, por që nuk kishte arritur shumicën në Kuvend, transmeton Telegrafi.
Për miratimin e qeverisë nevojiten të paktën 61 vota nga Kuvendi.
Derisa deri tani nuk është arritur ndonjë koalicion mes LVV-së dhe subjekteve të tjera, mbetet të shihet nëse kjo parti ka arritur të sigurojë votat e mjaftueshme për mandatarin Glauk Konjufca./Katror.info
