Agron Qalaj është emëruar ushtrues detyre i Kryeprokurorit të Shtetit, pas shkarkimit të Besim Kelmendit nga kjo pozitë. Vendimi u mor vetëm pak minuta më parë në mbledhjen e Këshillit Prokurorial të Kosovës (KPK), ku pesë vota pro mjaftuan që Kelmendi të shkarkohej.
Mbledhja u karakterizua nga tensione të larta dhe përplasje verbale mes anëtarëve të Këshillit. Gjatë diskutimit për futjen në rend dite të pikës për shkarkimin e Kelmendit, vetë ai dhe katër anëtarë të tjerë braktisën mbledhjen, duke akuzuar për tentativa për “shkatërrimin e sistemit prokurorial”.
Anëtari Veton Shabani u shpreh se sistemi prokurorial është më i madh se çdo individ dhe se, sipas tij, po synohet dëmtimi i tij. “Ka vetëm një adresë dhe një agjendë për dëmtimin e sistemit prokurorial, por kjo tentativë është e kotë. Nuk do të jem pjesë e këtyre agjendave të ulëta”, deklaroi ai para largimit.
Mundesh me e lexu edhe...
Ndërkohë, Arian Gashi e quajti të papranueshme dhe të paprecedent kërkesën për futjen e çështjes në agjendë, duke akuzuar për keqpërdorim të pozitës zyrtare. “Ky Këshill e ka humbur legjitimitetin sepse çdo aktivitet i ardhshëm do të jetë vazhdimësi e kësaj”, tha ai.
Në sallë pati replika edhe mes Hajdarajt dhe anëtarëve të tjerë, ndërsa tensionet çuan në largimin fillimisht të Gashit dhe Visar Krasniqit, e më pas edhe të Kelmendit dhe Dardan Vuniqit. Ky i fundit theksoi se integriteti i tij nuk lëkundet dhe se nuk do të marrë pjesë në vendime që, sipas tij, mund të jenë të ndikuara nga konflikte. “Mua më duhet ta lëshoj këtë takim, pasi ky konflikt është filluar pa qenë unë këtu”, u shpreh ai, duke shtuar se do të rikthehet kur të bindet se situata është qartësuar.
Pas largimeve dhe debateve, Shabani propozoi që të mos thirret më asnjë takim, ndërsa kryesuesi Hajdaraj vendosi që mbledhja të ndërpritet për një pauzë.
Pavarësisht tensioneve, shumica e mbetur në Këshill procedoi me votim, duke e shkarkuar Besim Kelmendin dhe duke emëruar Agron Qalajn ushtrues detyre të Kryeprokurorit të Shtetit./Katror.info
