Kosova është përzgjedhur si “Guest Country” në edicionin e sivjetëm të Festival de Cine Al Este, që po mbahet në Bogota të Kolumbisë, duke u prezantuar me një program të pasur filmash dhe aktivitetesh në kuadër të diplomacisë kulturore. Ky prezantim u realizua në bashkëpunim me Ambasadën e Republikës së Kosovës në Kolumbi, sipas Memorandumit të MPJD-së për promovimin ndërkombëtar të kulturës kosovare.
Programi u hap më 19 nëntor me shfaqjen e filmit të shumëvlerësuar “Zgjoi” me regji të Blerta Bashollit. Më 20 nëntor, publiku pati rastin të ndjekë “Okarina” të Alban Zogjanit, i cili ishte i pranishëm për një bisedë të hapur pas shfaqjes. Po atë ditë u shfaq edhe filmi “Zana” i Antoneta Kastratit, ndërsa drejtoresha e fotografisë, Sevdije Kastrati, ndau me publikun procesin krijues dhe iu përgjigj pyetjeve të tyre.
Më 21 nëntor, drejtoresha e Qendrës Kinematografike të Kosovës, Blerta Zeqiri, mori pjesë si paneliste në punëtorinë e dedikuar filmave të metrazhit të gjatë. Ajo diskutoi për mundësitë e koprodhimit në Kosovë, skemën e rabatit dhe zhvillimet në kinematografinë vendore. Punëtoria mblodhi regjisorë dhe producentë nga dhjetë projekte pjesëmarrëse nga Peruja, Ekuadori, Meksika, Kosta Rika, Kanadaja, Kili, Argjentina dhe Kolumbia.
Mundesh me e lexu edhe...
Institucionet kosovare dhe ekipet krijuese u falënderuan për përfaqësimin dinjitoz të kinematografisë së Kosovës në këtë festival ndërkombëtar./Katror.info
