Filmi kosovar “HANA”, me regji të Ujkan Hysaj dhe skenar të veçantë nga Prof. Fadil Hysaj, do të shfaqet premierë botërore në edicionin e 56-të të Festivalit Ndërkombëtar të Filmit në Goa, Indi, një nga festivalet më prestigjioze të kategorisë A (FIAPF) në botë.
Filmi është përzgjedhur për të garuar në kategorinë zyrtare për “ICFT-UNESCO Gandhi Medal Award”, një çmim që nderon filmat që pasqyrojnë idealet e UNESCO-s, si toleranca, dialogu ndërkulturor dhe paqja.
Në qendër të tregimit është Sara (Sheqerie Buqaj), një aktore që bashkohet me një program të Art Terapisë në Qendrën e Rehabilitimit për Gratë në Kosovë, për të ndihmuar të mbijetuarat të shndërrojnë dhimbjet e tyre në art. Por teksa ajo zhytet në historitë e grave, përballet edhe me plagët e veta të pasheruara, të lidhura me babanë dhe identitetin e saj të dytë, Hana.
Mundesh me e lexu edhe...
Në rolin e Mrikës është aktorja Fatlume Bunjaku, ndërsa produksioni është realizuar nga Ujkan Hysaj dhe Kushtrim Koliqi. Për realizimin vizual është përgjegjës Almir Djikolli, kurse muzika është nga Memli Kelmendi. Projekti është mbështetur nga Qendra Kinematografike e Kosovës.
Kjo përzgjedhje e filmit në një festival të rangut botëror shënon një arritje të rëndësishme për kinematografinë kosovare dhe për tematikën e thellë sociale që trajton./Katror.info
