Më shumë se 28 vjet pas vdekjes së saj në kryeqytetin francez, Princesha Diana u rishfaq në Muzeun ”Grévin” të Parisit, si një statujë dylli, në madhësi reale dhe e veshur me një nga fustanet e saj më të famshme.
“Princeshës së popullit” i është veshur fustani i zi me supe të hapura, që u bë i njohur si fustani i hakmarrjes, i kompletuar me çantën e vogël, takat e larta dhe gjerdanin me perla që mbante në atë kohë.
Diana zgjodhi veshjen për një darkë për mbledhje fondesh në qershor 1994 në Londër.
Mundesh me e lexu edhe...
Një ditë më parë, në një intervistë televizive, princi Charles kishte pranuar shkeljen e kurorës duke e shndërruar fustanin në një moment përcaktues të rebelimit mbretëror.
“Me ngjyrën e tij, prerjen e guximshme dhe dekoltenë e thellë, fustani i hakmarrjes sfidoi protokollin mbretëror”, tha në një deklaratë muzeu popullor i dyllit, i themeluar në 1882.
Ai u bë një simbol i lirisë së sapogjetur”, theksoi ai.
”Grévin” shtoi se Diana mbetet një ikonë globale e kulturës pop, e festuar për stilin, dhembshurinë dhe pavarësinë e saj.
Ajo vdiq në Paris më 31 gusht 1997, në moshën 36 vjeçe, pasi makina me të cilën udhëtonte me partnerin e saj, Dodi Fayed, u përplas me një shtyllë në një tunel gjatë një ndjekjeje nga paparacët.
Vdekja e saj shkaktoi një shpërthim pikëllimi në BM dhe në mbarë botën.
Në ”Grévin”, Diana do të paraqitet së bashku me një mori figurash të shquara të së kaluarës dhe të tashmes, përfshirë Mari Antuanetën, Beyoncé, Elton John, Albert Ajnshtajnin dhe Nelson Mandelën./KultPlus.com/Katror.info
