Edhe një javë kanë mbetur nga organizimi i Festivalit të Turizmit “Peja Outdoor Tourism Festival”.
Ky festival i organizuar për herë të parë në Kosovë, përgjatë ditëve 24, 25 dhe 26 Maj do të jetë mundësi e madhe e aventurës dhe argëtimit, ku Peja do të jetë qendra e aktiviteteve rekreative në natyrë.
Disa prej aktivitetve FALAS që vizitorët do të kenë mundësinë të marrin pjesë në to përfshijnë ecje në natyrë, çiklizëm, ngjitje në shkëmbinj, paragliding, speleologji si dhe udhëtime të ndryshme në shtigjet e Pejës, duke u njohur me trashëgiminë kulturore dhe natyrore të kësaj zone.
Mundesh me e lexu edhe…
Përveç aventurës dhe trashëgimisë, festivali ofron gjithashtu programe kulturore të pasura dhe konferenca që adresojnë çështje të rëndësishme si zhvillimin e infrastrukturës së turizmit aventuresk dhe sfidat në menaxhimin e turizmit të qëndrueshëm.
Sipas Agjensionit të Statistikave të Kosovës, vitin e kaluar Peja priti 563,000 vizitorë, duke forcuar reputacionin e saj si një qytet lider i turizmit. Dhe me lindjen e “Peja Outdoor Tourism Festival”, ky numër pritet të rritet edhe më tej.
Sipas Raif Gjikolli, udhëheqës i shoqatës bjeshkatare alpiniste “Gjeravica”, festivali ka lindur në kuadër të një projekti ku ai është angazhuar.
“Është projekti Cross Border me Malin e Zi. Aty kemi pasur një buxhet për një festival. Buxheti ka qenë shumë i vogël por pas disa konsultimeve me Shoqatat e Pejës që jemi aktive në këto aktivitete, kemi vendosur që t’i japim një frymë qytetit dhe vendosëm të bënim Festivalin e Pejës “Outdoor Tourism Festival”.
Tutje, ai shtoi se është menduar që çdo vit në fund të majit të bëhet hapja e Turizmit në qytetin e Pejës.
Festivali fillon më datë 24 maj dhe do të hapet me një konferencë ku do të ketë disa panele diskutimi ndër to edhe paneli për turizëm dhe për mjedis.
Pas konferencës, në orën shtatë në Galerinë e Arteve, të gjitha shoqatat e Pejës që merren me aktivitete outdoor do të kenë një ekspozitë promovuese.
Ndërkaq dita e shtunë dhe e diele do të jenë të pasuruara me një sërë aktivitetesh në terrene të përshtatshme për të gjithë ata të cilët nuk i kanë përjetuar më herët këto aventura.
Aktiviteti më sfidues pritet të jetë ngjitja në majën më të lartë të Pejës në Gurin e Kuq që gjendet në drejtim të Rugovës me një lartësi 2522m, por krahas saj do të ketë edhe aktivitete të tjera përfshirë pesë ecje gjithëpërfshirëse për të gjitha grupmoshat si dhe vrap malor.
Sipas Gjikollit, vitin e ardhshëm do të realizohen edhe tri shtige: sky running, trail running dhe vertikal running, projekte këto që do të realizohen direkt nga sheshi i qytetit të Pejës.
Ky festival synon të shërbejë si dëshmi e përpjekjeve bashkëpunuese të institucioneve publike dhe private në avancimin e sektorëve të turizmit dhe trashëgimisë kulturore në Pejë. Nëpërmjet një gamë të gjerë aktivitetesh dhe ngjarjesh, vizitorët e të gjitha moshave do të kenë mundësinë të eksplorojnë bukuritë natyrore, aventurat dhe trashëgiminë kulturore të kësaj zone.
Majlinda Kelmendi, Nora Gjakova, Distria Krasniqi e Mrika Nikqi do të jenë disa nga emrat e njohur publik që i bashkohen këtij Festivali të Turizmit!/Katror.info
Përgatiti:
