Rrugëtimin nëpër botë nuk e ka bërë si një turist i mirëfilltë. Ai ka udhëtuar për punë, është ndalur me muaj të tërë në vende të ndryshme dhe ka eksploruar vendet përmes gastronomisë. Ky rrugëtim për të, ka qenë njëkohësisht edhe pasurimi më i madh në karrierën e tij si shef kuzhine.
Artur Jella, prej 15 vitesh është vendosur në Spanjë, Valencia, ku ka hapur restorantet e tij me emrin ‘Shija’. Ai tregon se pavarësisht se ka punuar për të hapur 187 restorante në mbarë botën, është ende në kërkim të kafshatës përfekte.
Gjatë muajit dhjetor të vitit të kaluar, Arturi u shpall “Lider Ekselent” në fushën e gastronomisë nga Albanian Excellence.
Mundesh me e lexu edhe…
Karriera e tij nisi si një terapi
“Pas një aksidenti të rëndë nuk luaja dot më futboll, fushë të cilës i isha dedikuar shumë kur isha i vogël. Pas aksidentit, nisur nga gjendja e ngarkuar emocionale, një shok italian më fton të kaloj një fundjavë në Sicili”, thotë Jella.
Pikërisht aty ai dashurohet me kuzhinën. U befasua nga gatimi i ngadaltë dhe i vëmendshëm i një pjate “spageti” sa arriti të largojë të gjitha mendimet e tij që i rëndonin në kokë. Nga aty nisi rrugëtimi në kuzhinën ku edhe sot pas 30 vitesh thotë se gatimi është ende një terapi për të. Kur miqtë e tij e pyesin se kur pushon, ai thotë: “kur jam në kuzhinë”
Sukseset nuk janë rastësi dhe kjo dallon edhe tek Arturi. Kur ishte fëmijë i vogël, me talentin e tij në matematikë, merr pjesë në olimpiadat kombëtare e ndërkombëtare të matematikës. Sot gjendet me po aq pasion në kuzhinë, të cilës i dedikohet tërësisht.
Atij i pëlqejnë teknikat e gatimit francez, por ai mbetet mediterran dhe i dedikuar pas kuzhinës mediterrane, ku implementon teknikën franceze të gatimit. Ai në Paris zhvilloi praktikën e parë në kuzhinë, ku punoi për dy vite.
Pasi kërkoi shkollën më të mirë në Londër, si ndër më të mirët, nisi punë me shefin e tij, profesorin në fushën e gastronomisë. Hotel Hilton në Angli ishte destinacioni i tij i punës, deri sa njohu gruan e tij spanjolle dhe vendosën të transferoheshin në Spanjë.
Në zonën qëndrore të Valencias, 10 vite më parë ka hapur restorantin e tij “Shija”. Ndërsa së fundi në Altea, po hap një restorant të kuzhinës së lartë ballkanike, shqiptare.
“Jam shumë i interesuar që bota t’i njohë ushqimet tona”, thotë Jella në një intervistë për Businessmag.al.
“Shija” mund të cilësohet pa frikë një destinacion turisik shqiptar për spanjollët. Ata mund të njohin nga kultura jonë edhe pa mbërritur në Shqipëri fizikisht. Arturi punon me fanatizëm pjata të hershme shqiptare, duke i pasuruar dhe duke e ngritur nivelin e pjatës.
Udhëtimet e tij në Singapor, Kinë, Argjentinë, Afrikë, Amerikë e kanë bindur se lënda e parë për të nuk janë proteinat, por perimet, frutat dhe bishtajoret.
Pasi ka studiuar realitetin dhe klientin shqiptar, ai ka filluar të mendojë për një restorant në Shqipëri. “Në 2025 them se do të kem restorantin tim në Shqipëri”, tha Jella, duke shtuar se pas 10 vitesh synon të ketë më shumë kohë për të udhëtuar me familjen.
Përgatiti:
