Aeroporti Ndërkombëtar i Prishtinës “Adem Jashari” po vazhdon të shënojë rritje të ndjeshme në numrin e udhëtarëve dhe fluturimeve, duke përforcuar pozicionin e tij si një ndër institucionet më të rëndësishme ajrore në rajon.
Në një intervistë për Telegrafin zëdhënësja e aeroportit, Valentina Gara bëri të ditur se vetëm gjatë pesë muajve të parë të këtij viti, aeroporti ka regjistruar rritje të konsiderueshme si në numrin e udhëtarëve ashtu edhe në fluturime.
“Aeroporti Ndërkombëtar i Prishtinës edhe këtë vit ka filluar me një rritje të madhe të numrit të udhëtarëve. Në tre muajt e parë kemi pasur një rritje të jashtëzakonshme, po ashtu kemi vijuar edhe në muajin e 4 dhe të 5-të. Sa i përket fluturimeve, kemi pasur një rritje të fluturimeve, po ashtu krahas numrit të udhëtarëve. Destinacione, të cilat janë më të frekuentuara, janë destinacione për shtetin zviceran, shtetin gjerman, më pas pasohet nga Turqia, Vjena dhe pjesa tjetër e shteteve evropiane dhe botërore”, tha Gara.
Mundesh me e lexu edhe…
Gara tha se duke qenë të vetëdijshëm për fluksin në rritje, Aeroporti ka ndërmarrë një sërë masash për të përballuar sezonin e verës dhe kërkesën në rritje.
“Kemi shtuar kapacitetet infrastrukturore, siç është zgjerimi i portave hyrëse nga 8 në 12. Gjithashtu, janë bërë investime të rëndësishme në pistë, duke mundësuar pranimin e aeroplanëve më të mëdhenj. Një shembull konkret është fluturimi i parë i Airbus 350 nga kompania Edelweiss”, tha Gara.
Po ashtu, Aeroporti ka shtuar edhe kapacitetet njerëzore me rreth 50 punonjës të rinj të punësuar që nga janari.
“Meqenëse e kemi shtuar stafin e aeroportit apo numrin e punonjësve të aeroportit, kemi edhe trajnime shtesë dhe trajnime të cilat janë të obliguara për këta punonjës, në mënyrë që të kryhen detyrat dhe përgjegjësitë e tyre”.
Një tjetër risi është edhe shërbimi i vetë-pranimit të udhëtarëve (Self Check-in), i cili ka lehtësuar ndjeshëm procesin e regjistrimit dhe ka reduktuar radhët.Në kuadër të zgjerimit të destinacioneve, Aeroporti do të nisë së shpejti fluturimet direkte edhe drejt Francës.
“Më 3 korrik kemi fluturimin e parë inaugurues për Paris dhe Lyon. Do të ketë gjithsej katër fluturime javore për secilin destinacion, të hënave dhe të enjteve”, njoftoi Gara.
Zëdhënësja theksoi se një faktor i rëndësishëm në rritjen e fluksit është liberalizimi i vizave, i cili ka hyrë në fuqi që nga janari i vitit të kaluar, duke lehtësuar ndjeshëm udhëtimin për qytetarët e Kosovës. /Telegrafi./Katror.info
