Ndodh shpesh të jemi të dëshpëruar me shehrin tonë që nuk ka ngjyra, gjelbërim e hijeshi… Kënde të zymta, hapësira e objekte pa shije si trashëgimi e komunizmit ose edhe e hallakamës urbanistike që ka ndodhur së fundmi.
Këtë po mundohen ta ndryshojnë në Mitrovicë, qytetin me shumë probleme, aktivistët e organizatës “Futja Ngjyrë”, të cilët kanë nisë me i dhanë shehrit jetë me plot ngjyra.
E t’u mendu globalisht përmes artit, e vepru lokalisht, nuk kanë harru me e jetësu në grafiti figurën ikonë të Muharrem Qenës, artistit shumëdimensional mitrovicas, kanga e arti i të cilit jehon ndër shqiptarë që nga vitet e 60-ta e deri më sot.
Mundesh me e lexu edhe…
Duke e kombinuar të kaluarën dhe të tashmen, me talentin e tyre, objektet e ndryshme e urat i kanë veshur me ngjyra karakteristike për këtë qytet.
Bardhyl Dobroshi, drejtor ekzekutiv i organizatës “Futja Ngjyrë”, thotë se ideja iu erdhi meqë shehri iu duk i thatë.
“Jemi dalë, e kemi pa qytetin ka pasë vetëm shkronja, grafiti që kanë shkarravitë në to, vandalizëm. Kemi thënë OK, a mundemi me i ndreç këto. Ndoshta edhe ne po bëjmë ‘vandalizëm’, por po e bëjmë pak më mirë. Edhe tash për momentin jemi duke u mundu me u marrë me këta që po dalin përmbi murale, ndoshta mundeni me i pa edhe këto të shkarravinat, me i marë me i ushtru që hajde po shkarravitim, por po shkarravitim mirë,” shprehet ai.
Muralet janë punuar nga artistë edhe mitrovicas edhe të vendeve të tjera. E kjo është bërë me qëllim që edhe artistët e tjerë të rinj të mësojnë më shumë edhe ta duan më shumë këtë qytet.
“Në numër sa e di që 8 vjet i kemi bërë diku rreth 78- 80 (murale). E di që e kemi mat me kilometra, e di që kemi diku rreth 1.5 km që i kemi ngjyrosur, por rreth 78 murale janë disa të vogla disa të mëdha,” thotë Dobroshi.
Projekti në vetvete nuk përmban vetëm muralet.
“Jemi duke i bërë disa podkaste, ku po mundohemi me mishëru përpos artit të rrugës/ street art që e bëjmë, po mundohemi me i lidh edhe pjesët e tjera me të cilat merremi si organizatë edhe në fund me përfundu këtë projekt dhe pastaj me i jep vetës kohë me u ndi mire,” shpjegon Dobroshi.
Kështu duket murali në cilin është jetësuar portreti i Muharrem Qenës regjisor, producent, këngëtar, dhe skenarist shumë i dashur për publikun.
Pikërisht ky mural e solli të bijën Rebeka Qena në Mitrovicën e kujtimeve të babait të saj.
“Për mua edhe për familjen time ka qenë një ndjenjë shumë e bukur kur e kemi marë informatën. Në radhë të parë më pëlqeu edhe realizimi për aq sa mundesha me pa përmes fotografisë e jam shumë e emocionuar që kam ardhë këtu edhe po e shoh se ndoshta po duket edhe më bukur sesa që duket në fotografi. Edhe kur e kuptova që kush e ka realizu do të thotë që është një iniciativë e të rinjve të Mitrovicës gjithashtu më erdhi edhe më mirë do të thosha sepse po më gëzon ky fakt që po ka të rini, që Mitrovica po gjallëron dhe që po ka artistë të rinj të cilët ndërlidhen me veprat e personave të cilët kanë kriju edhe kanë kontribu për kulturë në Mitrovicë edhe në Kosovë edhe në Prishtinë. Gjithsesi ishte ndjenjë shumë e bukur,” shprehet Qena.
Ajo thotë se po i pëlqen fakti që gjithmonë ka të rinj që po gjejnë mënyra të inspirtohen prej personaliteteve që kanë kontribuar në vendin e tyre.
“Mitrovica është një lloj diamanti i cili ka nevojë kohë pas kohe me u fërku, me u shkëlqy edhe po më vjen shumë mirë. Kjo po më gëzon do të thotë që gjithsesi ka shumë të rinj të cilët bëjnë punë shumë interesante, e kemi rock shkollën e cila ndodhet këtu, ka shumë njerëz të cilët vazhdojnë me kontribu, vazhdojnë me punu edhe vazhdojnë me jetu edhe po them me kthy atë shpirtin me të cilin njihet Mitrovica. Edhe kjo ndërlidhje, edhe me bërë një ndërlidhje të së kaluarës edhe të njerëzve që kanë kontribu të njerëzve që inspirojnë është e bukur edhe e shprehin edhe talentin e tyre. Kështu që është njëfarë bashkëdyjëzimi i këtyre dy gjërave,” thotë aktorja Rebeka Qena.
Iniciativat e tilla te të rinjve ajo i sheh si nevojë për t’ia rikthyer Mitrovicës shkëlqimin të cilin realisht e ka.
Me këtë pajtohet Urall Boshnjaku, aktivist dhe gazetar nga Mitrovica.
“Ndryshimi i pamjeve të hapësirave publike e ka një rëndësi të veçantë për aspektin vizual për Mitrovicën meqë Mitrovica kaherë njihet si qytet i kulturës edhe artit edhe i gjanave të bukura edhe është mirë që Mitrovica me u duk bukur. Përtej faktit që si qytetar mundohem me qëndru edhe me kontribu këtu, unë mundohem kushtimisht po them me qenë edhe Ambasador i Mitrovicës që saherë kemi mysafir me iu prezantu vende të bukura. Edhe medoemos që mysafirët duhet me i dërgu në këso hapësira të bukura, të punume bukur për me i tregu që Mitrovica ka art dhe ka kulturë dhe ka kësi murale që i pasqyrojnë edhe fenomenet kulturore në Mitrovicë,” thotë Boshnjaku.
Uralli si i ri me ambicie që vendosi të qëndrojë e kontribuojë në Mitrovicë thotë se aktivizmi qytetar është çelësi për ndryshimet në shoqëri meqë është një formë e shprehjes së vullnetit për të bërë diçka të mirë në këtë shoqëri.
Ndërkaq, Rebeka është optimiste se sa më shumë t’iu jepet hapësirë të rinjve, aq më shumë kemi me u befasu për të mirë.
“Duhemi me ju dhënë hapësirë të rinjve për me u shprehë për me i kultivu format e tyre të artit. Edhe mendoj që në momentin që kanë hapësirë duhet me i dëgju edhe nevojat e tyre dhe sa i përket aktivizimit. Të gjithë janë të shqetësuar, të gjithë kanë qejf që të kontribuojnë diçka edhe mendoj që të rinjtë e dinë më së miri çka duhet ata të bëjnë për veten e tyre, por edhe çka duhet të bëjnë ata për të tjerë. Kështu që sa më tepër ju japim hapësirë aq më tepër kemi me u befasu me kujtesën e tyre për të kaluarën, por edhe me planet e tyre për të tashmen edhe për të ardhmen.”
Edicionin #5 të plotë e gjeni KËTU 🙂
Kliko këtu dhe bonja Follow/pëlqeje Katror.info për me pa veç Lajme të Mira 🙂
Përgatiti:
