Inteligjenca Artificiale (Al) mund të luajë një rol kryesor në diagnostifikimin e hershëm të njerëzve që janë në rrezik të dështimit të zemrës, pasi thuhet të jetë në gjendje të identifikojë anomalitë që tradicionalisht janë të vështira për t’u zbuluar, sipas një studimi.
Sëmundjet e zemrës dhe ato të qarkullimit të gjakut janë “vrasësit” më të shpeshtë në botë, duke marrë një në tre jetë çdo vit.
Siç raportohet, studiuesit në Skoci kanë nisur të testojnë se si Al mund të ketë “përfitime reale” për ata që janë në rrezik nga këto sëmundje.
Mundesh me e lexu edhe…
Falë pacientëve që i kanë ofruar vullnetarisht të dhënat e tyre në Regjistrin skocez të Kërkimeve Shëndetësore dhe Biobank (SHARE), studiuesit e Mjekësisë të Universitetit të Dundee kanë bashkëpunuar me një grup prej 578 personash për të parë se si Al mund të ndihmojë në diagnostifikimin e sëmundjeve të zemrës.
Ekipi, hulumtimi i të cilit është botuar në revistën ESC Heart Failure, ka përdorur Al për të marrë në pyetje të dhënat elektronike shëndetësore të grupit dhe skanimet e zemrës me ekokardiografi.
Të dhënat më pas janë përdorur për të ekzaminuar imazhet që identifikojnë anomalitë, shkruan skynews, përcjell Telegrafi.
“Kjo mund të na lejojë të thjeshtojmë identifikimin e pacientëve me dështim të zemrës”, tha profesori Chim Lang.
“Kur krahasohen me raportet e krijuara nga skanimet rutinë të zemrës, ato të përmirësuara nga AI janë më të detajuara dhe gjithashtu mund të përpunohen në shkallë më të madhe”, shtoi Lang.
Sipas ekspertëve, dështimi i zemrës është një gjendje shumë e përhapur, por e nën-diagnostifikuar, që do të thotë se zemra nuk është në gjendje të pompojë gjakun nëpër trup në mënyrë efektive.
Ndërsa simptomat mund të kontrollohen në një farë mase përmes ndryshimeve të stilit të jetesës, kirurgjisë dhe mjekimit, në shumicën e rasteve gjendja është serioze dhe përkeqësohet me kalimin e kohës.
Sipas një raporti nga Fondacioni Britanik i Zemrës (BHF), rreth 20.5 milionë njerëz kanë vdekur në mbarë botën si pasojë e sëmundjeve të zemrës dhe të qarkullimit të gjakut në vitin 2021 – ekuivalente me një vdekje çdo 1.5 sekonda. /Katror.info
Përgatiti:
