A keni menduar ndonjëherë se puna vullnetare mundet me ju hap dyert e karrierës? Te rinjve edhe mund t’iu duket se nuk ia vlen te punohet pa pagese. Por, Zelushe Kelmendi që drejton Qendrën Rinore ne Obiliq e dëshmon të kundërtën. Të paktën dy vullnetarë që kanë punuar në këtë qendër kanë përfituar duke u punësuar vetëm në bazë të përvojës vullnetare, njëra ne SHBA e tjetri në Aeroport të Prishtinës.
“Kjo puna e vullnetarizmit fatkeqësisht në Kosovë shumë pak vlerësohet, por kur shkojnë jashtë vendit, shumë vlerësohet. Unë kam pas rastin kur kam pasur këtu një vullnetare me vite të tëra ka punu me mua bashkë edhe ka ardhur koha si çdokujt me u martu edhe është dashtë me shku në Shtetet e Bashkuara të Amerikës. Gjatë aplikimit, në CV-së që e ka kërku ai vend pune, i kanë kërkuar një letër që ka kryer punë vullnetare edhe ajo më ka kontaktua mua edhe unë ja kam dërguar përmes e-mailit, d.m.th ajo është pranuar falë punës vullnetare të cilën e ka kryer në Qendrën Rinore të Obiliqit.”
“Kështu që nuk është ajo që vetëm bëjmë diçka, por edhe vlerësohet, të paktën jashtë vendit, por po besoj që edhe në Kosovë shumë shpejt do të vjen kjo që do të vlerësohet. Edhe pse edhe në Kosovë kemi njëfarë lëvizje të vogël, unë kam pas një të ri këtu një të ri që është punësuar në Aeroportin e Prishtinës, falë CV-së që ka bërë punë vullnetare këtu në Qendrën Rinore të Obiliqit”, thotë Zelushja.
Mundesh me e lexu edhe…
Pjesëmarrja në qendrat rinore dhe aktivitetet vullnetare ka përfitime të shumta, si në nivel individual ashtu edhe në atë shoqëror. Me këtë qëllim ka filluar dhe po vazhdon punën edhe kjo qendër rinore.
“Kjo qendër është hapë me qëllim që t’i avancojmë të rinjtë në aktivitetet e tyre kulturore, artistike, në edukimin e tyre joformal, përgatitjet e tregut të punës, d.m.th këto kanë qenë qëllimet e hapjes së qendrës rinore. Në kohën kur është hapur Qendra Rinore e Obiliqit, ka pas ndoshta edhe qendra të tjera sepse ka qenë një organizatë gjermane e cila ka bërë iniciativën dhe hapjen e këtyre qendrave rinore, fatin e ka pas edhe Qendra Rinore e Obiliqit, atëherë ka qenë GiZ-i gjerman edhe tash fatkeqësisht janë do qendra që numërojnë në gishta që kanë mbijetuar, një ndër to është edhe Qendra Rinore e Obiliqit. Ndoshta me thënë aktiviteti edhe puna jonë që jemi mundu gjatë gjithë kohës me mbajt aktive ka qenë kjo që sot është Qendra Rinore e Obiliqit, punon në baza ditore, hapet çdo ditë dhe kemi aktivitete për të rinjtë”, shprehet ajo.
Nga puna me të rinjtë kjo qendër po u ofron qasje kulturore edhe personave me aftësi të veçanta.
“Ne veç e kem përmbyllur tani një projekt me Ministrinë e Kulturës, e kishim gjurmët e trashëgimisë kulturore, një projekt qëllimi i të cilit ka qenë që aktivitetet kulturore ku janë monumentet kulturore, të shikohen edhe përmes personave me nevoja të veçanta apo personat e verbër, d.m.th, ka qenë qëllimi se sa kanë punuar institucionet qendrore edhe lokale në këtë drejtim, se këta persona kur shkojnë vizitojnë një aktivitet kulturor, me pa edhe ata përmes alfabetit të tyre”, thekson ajo.
Puna vullnetare i ndihmon të rinjtë të kuptojnë sfidat me të cilat përballen të tjerët dhe i nxit ata të bëhen më empatikë dhe më të ndërgjegjshëm për nevojat e komunitetit të tyre, andaj edhe projektet me të cilat merret kjo kategori shoqërore në këtë qendër, përveç aftësimit personal po ndihmon edhe komunitetin në forma të ndryshme.
“Unë po nisna prej vetes sa kam bërë punë vullnetare gjatë gjithë kohës edhe pse kam një moshë tash është bo, po gjithmonë ka qenë e mirë sepse e kam zgjidhur një problem brenda komunitetit, tash ne e kemi pas një projekt këtu brenda Obiliqit ku kanë qenë iniciativat qytetare se cila është ideja e një qytetari që do me bo një ndryshim, e kanë bërë një iniciativë shumë të mirë edhe ka pas një rezultat shumë të mirë. Ambienti që është jashtë kur erdhët para Xhamisë është falë punës dhe aktivitetit të qytetarëve që e kanë bërë në mënyrë vullnetare, por gjithmonë me donatorin që i ka dhanë mjetet e veta”, ka thënë ajo.
Përveç projekteve, të rinjtë në këtë qendër përfshihen edhe në diskutime e debate për të zgjidhur problemet e qytetit ku jetojnë, ndërsa Obiliqi duke qenë një qytet me problematikë të ajrit, të rinjtë e kësaj komune angazhohen edhe në kampanja vetëdijësese.
Ndërsa Zelushja thekson rëndësinë e angazhimit qytetar dhe qendrave rinore si kjo e Obiliqit.
“Unë iu kisha thënë të rinjve sa më shumë me qenë afër qendrave rinore, sepse qendrat rinore aty ku veprojnë, ofrojnë edhe të mirat për ta sepse i ngrisin kapacitetet e tyre edhe bëjnë një CV, sepse nëse shkojnë në një vend të punës diku gjithmonë i kërkohet një CV, një përvojë e punës, kështu që përmes qendrave rinore, munden me bo një CV, andaj iu kisha ftu që të jenë afër qendrave rinore”, përfundon ajo.
Qendra Rinore e Obiliqit ofron aktivitete të rinjve që nga viti 2011. Kjo qendër synon jo vetëm përmirësimin e mirëqenies se te rinjve, por gjithashtu ndihmon në krijimin e një shoqërie më të fortë qe di si t’i trajtoje sfidat dhe problemet e ndryshme shoqërore. /Katror.info
Edicionin #56 të plotë e gjeni KËTU 🙂
Përgatiti:
