.Anija kozmike Psyche, e cila i përket agjencisë amerikane të hapësirës NASA, u lëshua me sukses dhe filloi udhëtimin e saj gjashtëvjeçar drejt asteroidit me të njëjtin emër.
Asteroidi Psyche, sipas shkencëtarëve, dikur ishte një bërthamë e një planeti. Një asteroid i pasur me hekur dhe nikel mund të përmbajë të dhëna që lidhen me formimin e planetëve duke përfshirë Tokën, shkruan Katror.info.
Anija kozmike Psyche u nis në fund të javës së kaluar nga raketa Falcon Heavy e SpaceX nga Qendra Hapësinore Kennedy në Florida dhe të dhënat telemetrike tregojnë se ajo mbërriti në hapësirë në gjendje të mirë. Misioni u vonua disa herë, por nisja më në fund ndodhi.
Mundesh me e lexu edhe…
Anijes kozmike do t’i duhen rreth gjashtë vjet për të arritur asteroidin dhe më pas do të rrotullohet rreth tij për 26 muaj, duke e studiuar atë me instrumente të ndryshme. Ajo do të përdorë kamera për pamje “nga afër”, një magnetometër për të kërkuar fushën magnetike, një spektrometër të rrezeve gama për të zbuluar rrezet gama me energji të lartë dhe neutronet dhe një antenë radio për të hartuar gravitetin e shkëmbinjve hapësinorë.
“Jam i ngazëllyer për faktin se thesari i shkencës Psyche do të hapet si misioni i parë i NASA-s në “botën metalike”. Duke studiuar asteroidin Psyche, ne shpresojmë të kuptojmë më mirë universin dhe vendin tonë në të, veçanërisht në lidhje me bërthamën misterioze metalike të planeti Tokë,” tha Nicola Fox, një bashkëpunëtor në Drejtorinë e Misionit Shkencor të NASA-s.
Asteroidi Psyche rrotullohet rreth Diellit në brezin midis orbitave të Marsit dhe Jupiterit. Studiuesit vlerësojnë se 30 deri në 60 për qind e bërthamës së tij është një kombinim i hekurit dhe nikelit.
“Bazuar në të dhënat që kemi, do të thosha se më shumë se gjysma e tij është metal. Ne do të shohim një lloj të ri objekti, kështu që shumë nga idetë tona mund të vërtetohen të gabuara,” tha Lindy Elkins-Tanton, profesore në Universitetin Shtetëror të Arizonës.
Anija kozmike do të testojë gjithashtu komunikimet laser të NASA-s në hapësirën e thellë, një metodë eksperimentale e komunikimit që mund të rrisë gjerësinë e brezit 100 herë mbi standardin aktual, e që janë valët e radios.
“Brenda disa javësh, Deep Space Optical Communications do të fillojë dërgimin e të dhënave në Tokë për të testuar një aftësi kyçe për të ardhmen e eksplorimit të hapësirës. Ajo që mësojmë do të na ndihmojë të avancojmë teknologjitë e reja inovative dhe të ndjekim qëllime më të guximshme në hapësirë”, tha Dr. Prasun Desai, administrator i asociuar në selinë e NASA-s./Katror.info
Përgatiti:
