Filmi “Anora” i Sean Baker, një odise komike, por shkatërruese që flet për një punëtore seksi që martohet me djalin e një oligarku të pasur rus, ka fituar çmimin kryesor të Festivalit të Filmit në Cannes, Palmën e Artë.
Fitorja për “Anora” shënon një pikë të re kulmore për Baker, regjisorin e “The Florida Project”.
Është gjithashtu, çuditërisht, e pesta në radhë – për fitoren e Palmës së Artë – nga shtëpia e prodhimit të filmave “Neon”.
Kjo pas “Parasite”, “Titane”, “Triangle of Sadness” dhe fituesin e vitit të kaluar, “Anatomy of a Fall”.
“Unë nuk e di vërtet se çfarë po ndodh tani”, tha Baker.
Ndërsa “Anora” ishte padyshim filmi më i vlerësuar i festivalit, fitorja e tij ishte një surprizë.
Shumë prisnin që të fitonte drama indiane “All We Imagine As Light” ose filmi iranian “The Seed of the Sacred Fig”.
Të dy këto filma morën edhe çmime në shtëpi.
Megjithatë, kjo nuk ishte surpriza e vetme e ceremonisë.
Përpara se George Lucas t’i jepej një Palmë e Artë nderi, shfaqet miku i tij i vjetër, Francis Ford Coppola, duke ribashkuar dy nga figurat më kryesore të gjysmëshekullit të fundit të kinematografisë amerikane.
“All We Imagine As Light”, fitoi Çmimin e Madh, nderimi i dytë më i lartë në Kanë.
Juria i dha një çmim special “The Seed of the Sacred Fig” të Mohammad Rasoulof, një dramë e realizuar fshehurazi në Iran.
Disa ditë përpara premierës së filmit, Rasoulof, i përballur me një dënim me tetë vjet burg, u largua nga Irani në këmbë.
Filmi i tij, i cili përfshin pamje reale nga demonstratat 2022-2023 në Iran, e kanalizon shtypjen iraniane në një dramë familjare.
Turma e Kanës takoi një Rasulof të emocionuar, i cili u prit me duartrokitje.
Filmi horror i Coralie Fargeat “The Substance”, ku luan Demi Moore, fitoi për skenarin më të mirë.
“Unë me të vërtetë besoj se filmat mund të ndryshojnë botën, kështu që shpresoj se ky film do të jetë një gur i vogël për të ndërtuar themele të reja”, tha Fargeat.
“Unë me të vërtetë mendoj se ne kemi nevojë për një revolucion dhe nuk mendoj se ka filluar ende”, shtoi ajo
Disa menduan se Moore mund të merrte aktoren më të mirë, por ai çmim shkoi për një grup aktoresh: Karla Sofía Gascón, Zoe Saldaña, Selena Gomez dhe Adriana Paz për filmin “Emilia Perez” të Jacques Audiard, një muzikal në gjuhën spanjolle për një bos droge meksikan.
Gascón, i cili pranoi çmimin, është aktori i parë trans që fiton një çmim të madh./Katror.info
Përgatiti:
