Instituti Kombëtar i Shëndetësisë Publike të Kosovës (IKSHPK) ka lëshuar një njoftim sensibilizues për qytetarët, duke kërkuar kujdes të shtuar ndaj sigurisë ushqimore gjatë muajve të verës. Me rritjen e temperaturave, sipas IKSHPK-së, krijohen kushte të favorshme për shumimin e mikroorganizmave të dëmshëm, të cilat e bëjnë ushqimin më të ndjeshëm ndaj prishjes dhe rrisin ndjeshëm rrezikun e helmimeve ushqimore, shkruan Katror.info.
Siguria ushqimore, siç thekson instituti, nënkupton mbrojtjen e ushqimit nga çdo formë kontaminimi që mund të dëmtojë shëndetin e konsumatorëve. Bakteret, viruset, parazitët, kimikatet e rrezikshme dhe ndotjet fizike – si kockat, fijet e flokëve apo copat e metaleve – janë ndër faktorët më të zakonshëm që shkaktojnë kontaminim. Këto ndotje mund të vijnë nga duart e papastra, ushqimet e tjera të kontaminuara, uji i pasigurt, apo kontaktet me insektet dhe kafshët shtëpiake.
Simptomat e helmimit ushqimor zakonisht paraqiten shpejt pas konsumimit të ushqimit të ndotur dhe përfshijnë temperaturë, dhimbje barku, të vjella dhe barkqitje.
Mundesh me e lexu edhe…
Për të parandaluar këto pasoja shëndetësore, IKSHPK rekomandon disa masa bazë parandaluese. Ndër to përfshihen gatimi i mirë i ushqimit, sidomos i mishit, vezëve dhe qumështit, konsumimi i ushqimit menjëherë pas përgatitjes, ruajtja në temperatura të sigurta, ringrohja e plotë para konsumit dhe ndarja e ushqimit të papërpunuar nga ai i gatuar. Po ashtu, theksohet rëndësia e larjes së duarve, mbajtjes së pastër të kuzhinës, përdorimit të ujit të sigurt dhe kontrollimit të datës së skadimit të produkteve. Gjatë udhëtimeve dhe piknikeve, rekomandohet përdorimi i frigoriferëve dore ose enëve termoizoluese.
IKSHPK u bën thirrje qytetarëve që të jenë të kujdesshëm në përgatitjen dhe ruajtjen e ushqimit, duke theksuar se “Vera e sigurt fillon nga kuzhina”. Kujdesi i përditshëm është mbrojtja më e mirë për shëndetin e familjes./Katror.info
