Qytetarët e Kosovës po përballen me një tjetër barrë financiare, pasi Zyra e Rregullatorit për Energji (ZRRE) ka propozuar një rritje prej 15% të çmimit të energjisë elektrike, shkruan Katror.info.
Për ta kundërshtuar këtë vendim, iniciativa qytetare “Asnjë cent ma shumë!” po thërret një diskutim të hapur këtë të martë, më 18 mars, në hapësirat e Termokiss-it, duke filluar nga ora 20:00.
Në një deklaratë në rrjetet sociale, iniciativa qytetare ka kritikuar ashpër mënyrën se si është marrë ky vendim, duke theksuar se ZRRE nuk ka mbajtur asnjë konsultim paraprak me qytetarët. Sipas tyre, propozimi për rritjen e çmimit vjen në një kohë kur pagat mbeten të pandryshuara, ndërsa kostoja e jetesës po rritet çdo ditë.
Mundesh me e lexu edhe…
“Edhe pa këtë rritje të propozuar, barra financiare për qytetarët e Kosovës është e papërballueshme. Në vend që të adresohen reduktimet e vazhdueshme dhe të ndalen subvencionimet e operatorëve privatë, po përballemi me një rritje tjetër të pajustifikueshme të tarifave,” thuhet në thirrjen e iniciativës qytetare.
Ndërkohë që gjatë ditës së djeshme u raportua se Zyra e Rregullatorit për Energji (ZRRE) publikoi Raportet Konsultative për të hyrat maksimale të lejuara për operatorët e energjisë elektrike – KOSTT, KEDS dhe FSHU – duke hapur mundësinë për komente deri më 28 mars.
ZRRE pretendon se ky proces synon të sigurojë transparencë dhe përfshirje të të gjitha palëve të interesuara në vendimmarrje, por nismat qytetare e shohin të papranueshme që konsultimet me publikun të mbahen vetëm pasi është propozuar rritja e çmimit. Në këtë kuadër, ky takim është organizuar për të diskutuar kundërshtimin e këtij vendimi.
Ndërkaq, edhe përfaqësues të komunitetit të biznesit dje gjatë ditës shprehën shqetësimin se rritja e çmimit të energjisë do të ndikojë ndjeshëm në koston e operacioneve të tyre, veçanërisht për sektorin e prodhimit, i cili tashmë përballet me sfida të mëdha.
Kryetari i Odës Ekonomike të Kosovës, Lulzim Rafuna, kërkoi që ky vendim të shtyhet për të paktën një vit, me arsyetimin se është marrë në një periudhë shumë të shkurtër, pa i lënë kohë bizneseve të përshtaten./Katror.info
Përgatiti:
