Kush do ta besonte se Kosova do të bëhej lajm, e për me tepër do të përgëzohej jo për të arritura politike, e sportive, por për një fushë që nuk zë vend shumë në diskursin publik – për astronominë.
Është hapja e Observatorit dhe Planetariumit të parë Kombëtar në Kosovë, që ka ka bërë jehonë të madhe duke pranuar mesazhe urimi nga vetë astronauti legjendar i Apollo 16, Charlie Duke dhe astrofizikanti Bryan May, që adhuruesit e muzikës mund ta njohin më shumë si kitaristi legjendar i grupit Queen.
Astronomja kosovare, që po doktoron në hulumtimet hapesinore në SHBA, ka ndarë me ndjekësit dy videomesazhet në rrjetin e saj në Facebook.
Mundesh me e lexu edhe...
Pranvera Hyseni ka bërë të pamundurën përmes Astronomy Outreach Kosovo që jo vetëm të hapë, por edhe të pajis Observatorin me teleskopë të avancuar, sistem diellor dhe mjete tjera për të rinjtë që duan të eksplorojnë hapësirën.
Astronauti i Apollo 16, Charlie Duke, që është i 10-ti që ka shkelur në Hënë, ka nderuar Astronomy Outreach of Kosovo, duke përgëzuar në veçanti astronauten kosovare, Pranvera Hysenin.
“Ne thjesht duam të të urojmë gjitha të mirat me Planetariumin dhe Observatorin e ri. Ne mendojmë se ajo që po bën për të rinjtë në Kosovë është një mundësi e mrekullueshme për ata dhe për ty, dhe faleminderit shumë kohën tënde, përpjekjet dhe investimin për të hapur këtë Planetarium për të rinjtë e Kosovës. Do të jetë një bekim i madh për ta jam i sigurt,” tha Duke përmes një video mesazhi, duke thënë se Observatori do të hapë mundësi të mëdha për të rinjtë në Kosovë.
Observatori dhe Planetariumi Kombëtar i Kosovës është hapur më 20 qershor në fshatin Rashincë të Shtimes, duke sjellë shumë ekspertë të huaj të astronomisë.
Kitaristi legjendar i grupit Queen, Bryan May, i cili është një astrofizikan i shquar, përmes një videomesazhi, hapjen e Observatorit dhe Planetariumit Kombëtar të Kosovës e ka parë si mundësi të shkëlqyer për të rinjtë në Kosovë.
“Po ju telefonoj për t’ju uruar për inaugurimin e parë të Observatorit në Kosovë. Astronomia do të triumfojë falë punës suaj të palodhur dhe këmbënguljes suaj gjatë 5 vjeteve të fundit. Ju uroj një ditë të mrekullueshme dhe një të ardhme të mrekullueshme në astronomi. Zoti ju bekoftë!”
Pranvera e yjeve, nuk ka pasur se si të ndjehet ndryshe, pos skajshmërisht e lumtur me këto mesazhe.
“Zemrat tona u ndriçuan me një surprizë të pabesueshme. Ky moment historik shënon një hap të madh për vendin tonë, duke na sjellë më afër botës së astronomisë dhe zbulimeve të reja. Falënderimet tona më të përzemërta shkojnë për astronautin Charlie Duke, Dario Kubler, Rodrigo Araya, dhe për të gjithë ata që kontribuan në realizimin e kësaj arritjeje të jashtëzakonshme,” ka shkruar ajo.
“Brian May, kitaristi legjendar i grupit Queen dhe një astrofizikan i shquar, na nderoi me një mesazh të veçantë për hapjen madhështore të Observatorit dhe Planetariumit Kombëtar të Kosovës. Ky moment historik për ne shënon një periudhë të re, duke na lidhur me komunitetin global të astronomisë. Çfarë përkrahje e fuqishme! “
Observatori sipas Pranverës është një mrekulli teknologjike që do të mundësojë përjetimin e ngjarjeve të shumta të kozmosit në një mënyrë interaktive.
Observatori dhe Planetariumi Kombëtar po shërben si një burim i pasur i njohurive dhe informacionit për të gjithë ata që janë të interesuar të mësojnë më shumë rreth botës së astronomisë.
Kompania “Celestron” e ka vizituar Kosovën për ta funksionalizuar Observatorin dhe Planetariumin Kombëtar të Kosovës me pajisje që kapin vlerën rreth 100,000€.
“Celestron konsiderohet si një pionier dhe udhëheqës në fushën e teknologjisë optike, veçanërisht në prodhimin dhe zhvillimin e teleskopëve dhe pajisjeve të tjera astronomike. Kompania shquhet për inovacionin e tyre të vazhdueshëm dhe cilësinë e lartë të produktit, duke ofruar një gamë të gjerë të pajisjeve për hobistët dhe profesionistët e astronomisë.
Përveç kësaj, Celestron njihet për angazhimin e tyre në mbështetjen e komunitetit global të astronomisë, duke sponsorizuar ngjarje dhe programe edukative që promovojnë interesin dhe shkencën e astronomisë në nivel botëror. Në përgjithësi, Celestron përfaqëson standardet më të larta të cilësisë dhe shërbimit në botën e teleskopëve dhe pajisjeve të tjera astronomike”, pat thene Hyseni.
Hap të madh ka ndërmarrë edhe Milaim Rushiti nga fshati Rashince i Shtimes, profesor i astronomisë në Gjimnazin Shkencor “Kuvendi i Arbrit” në Ferizaj.
Ai i ka falur 5 ari të tokës së tij për ndërtimin e Observatorit dhe Planetariumit Kombëtar të Kosovës. /Katror.info
Përgatiti:
