Autostrada Biennale ka shpallur konkurs për 15 pozita pune për të rinjtë e moshës 18–30 vjeç, për angazhim gjatë edicionit të pestë të Bienales Ndërkombëtare të Artit Bashkëkohor, që do të mbahet nga 5 korriku deri më 5 tetor 2025 në Prizren.
Sipas njoftimit të publikuar në rrjetet sociale të organizatës, pozitat janë për staf në hapësirat ekspozuese dhe përfshijnë një periudhë angazhimi katërmujor, nga 10 qershori deri më 10 tetor, me kohë të plotë pune (40 orë në javë). Kandidatët duhet të kenë njohuri në gjuhën shqipe dhe angleze, aftësi komunikuese dhe interes për artin bashkëkohor.
Angazhimi ndahet në tri faza: përgatitja e hapësirave para hapjes së bienales, ndërmjetësimi me vizitorët gjatë ekspozitave dhe ndihmesa në përmbyllje.
Mundesh me e lexu edhe…
Aplikimi bëhet përmes formularit online dhe dërgimit të CV-së në adresën zyrtare të organizatës. Afati i fundit për aplikim është 30 maj 2025.
Autostrada Biennale e themeluar në vitin 2017, është një prej ngjarjeve më të rëndësishme të artit bashkëkohor në Kosovë, që sjell artistë dhe kuratorë ndërkombëtarë në qytetin e Prizrenit, duke e kthyer atë në një hapësirë ndërkulturore për dialog dhe krijimtari. /Katror.info
Përgatiti:
