Paraditen e së mërkurës presidenti i Këshillit Evropian, Antonio Costa, përçoi mesazhe optimiste në Podgoricë, duke lavdëruar vendin për arritjet e tij drejt rrugës europiane. Në po të njëjtën ditë, pasdite, Costa erdhi në Prishtinë. Por, këtu në vend të lëvdatave, Costa u përkujdes të dërgonte mesazhet se sa e rëndësishme ishte për Kosovën të ndërmarrë hapat e kërkuar drejt synimit të saj për bashkim me BE-në. Në takimet me krerët e vendit, Costa prej Kosovës kërkoi të jetë “partner i besueshëm e konsistent”.
Zgjerimi në Ballkanin Perëndimor është investimi më i rëndësishëm gjeopolitik për Bashkimin Europian – është edhe angazhimi im personal, tha Costa në fillim të fjalimit të tij në konferencën e përbashkët për media me presidenten Vjosa Osmani pas takimit që zhvilluan.
“Është një investim në paqe dhe stabilitet dhe sjell përfitime të konsiderueshme për qytetarët tuaj”.
Mundesh me e lexu edhe...
Për temat që përzgjodhi të flasë në Prishtinë, Costa u kujdes që t’i vë në një rresht edhe përfitimet që do t’i ketë Kosova nga Bashkimi Europian edhe detyrimet që ajo duhet t’i zbatojë paraprakisht.
Për procesin e dialogut Kosovë-Serbi, Costa përkujtoi që është kyç për Kosovën dhe Serbinë që të ecin para.
“Siç e dini, është po ashtu jetike të bëhet progres i vërtetë dhe i prekshëm në këtë dialog dhe të normalizohen marrëdhëniet midis Kosovës dhe Serbisë. Kjo duhet të jetë në dobi të rrugës suaj europiane dhe në fund të fundit të jetës së kosovarëve”.
Vendi i Kosovës është në familjen e Bashkimit Evropian, shtoi Costa, por tha se kjo gjithashtu kërkon që të përmbushen zotimet.
Costa gjithashtu tha se Plani i Rritjes për Ballkanin Perëndimor është një mundësi e madhe.
“Është thelbësore të vazhdoni punën për zbatimin e agjendës suaj ambicioze të reformave, në mënyrë që të përfitoni plotësisht prej saj”, tha ai për paketën e BE-së për vendet e Ballkanit Perëndimor, nga e cila disa nga gjashtë vendet e rajonit veçse kanë nisur të marrin përfitimet.
Në fund, Costa tregoi pritshmëritë e BE-së për Kosovën – që të jetë partnere e besueshme.
“Në fund të fundit, gjithçka varet nga ndërtimi i besimit, për të qenë një partner i besueshëm dhe i qëndrueshëm. Brenda vendit. Me fqinjët tuaj. Me partnerët tuaj të Bashkimit Evropian”.
Megjithatë, as Costa s’u largua nga vendi pa i pranuar disa kërkesa nga nikoqirët.
Kryeministri në largim, Albin Kurti, i cili është edhe politikani më përgjegjës për raportet jo të mira të Kosovës me bllokun evropian, ia ka përmendur se kanë kaluar gati dy vite e gjysmë që nga aplikimi i Kosovës për anëtarësim në BE dhe ka kërkuar nga presidenti Costa rol aktiv për dërgimin e pyetësorit dhe dhënien e statusin të vendit kandidat.
Ai gjithashtu, kërkoi heqjen e plotë dhe të menjëhershme të masave kufizuese të BE-së ndaj Kosovës, sipas Zyrës së Kryeministrit.
Po të njëjtat kërkesa i bëri edhe presidentja Vjosa Osmani para Costas në konferencë.
Në Podgoricë, Costa më shumë dha lëvdata sesa që bëri kërkesa ndaj vendit. E vetmja kërkesë e tij ishte që Mali i Zi të jetë konsistent në rrugën e nisur drejt BE-së.
“Mali i Zi është një nga shembujt më të mirë të momentit pozitiv të zgjerimit të BE-së”, tha ai, duke shtuar se slogani i 28-i anëtar i BE-së më 2028 është slogan i mirë për vendin ballkanik, por tha se “mund të jetë një arritje më e mirë të arrish atje para vitit 2028”.
Problemin që BE e ka me Serbinë për mospërshtatje me politikën e jashtme të Unionit, Costa e vuri në pah që Mali i Zi edhe në këtë drejtim u tregua i suksesshëm.
“Ju po i kryeni jo vetëm reformat, por gjithashtu po ruani harmoninë e plotë me Politikën e Përbashkët të Jashtme dhe të Sigurisë të BE-së, përkatësisht duke mbështetur një paqe të drejtë dhe të qëndrueshme në Ukrainë”.
Për dallim nga Prishtina e Podgorica, në Beograd Costas iu desh të arsyetonte vizitën e tij meqë erdhi pas asaj të presidentit të Serbisë, Aleksandar Vuçiq, në Moskë ku edhe takoi presidentin rus.
Për Costan pati thirrje që të anulonte vizitën e tij në Serbi për këtë arsye, por portugezi e arsyetoi atë duke thënë se ajo nuk është zgjidhje.
“Mënyra e vetme për të përballuar dallimet është të flasim dhe të kuptojmë njëri-tjetrin, të kuptojmë se çfarë duhet të bëjmë së bashku. Prandaj jam këtu, shumë njerëz më thanë të mos vij, por unë vendosa të vij, sepse nëse kemi problem me Serbinë, nëse kemi problem me presidentin (i Serbisë, Aleksandar) Vuçiq, zgjidhja nuk është ‘mos hajde’ dhe ‘mos fol’, por që unë të vij, të flas, të shpjegoj këndvështrime të ndryshme”. /GazetaExpress /Katror.info
Përgatiti:
