Në një draft-raport të miratuar më 15 tetor, Komiteti për Sigurinë dhe Mbrojtjen në Parlamentin Evropian ka propozuar zgjerimin e partneriteteve strategjike të Bashkimit Evropian në fushën e mbrojtjes dhe sigurisë, duke përfshirë edhe vendet kandidate të Ballkanit Perëndimor.
Në dokumentin e përgatitur nga raportuesi Michał Szczerba, theksohet se bashkëpunimi në fushën e sigurisë është “një domosdoshmëri dhe jo një zgjedhje” për BE-në, në kushtet e agresionit rus ndaj Ukrainës, konkurrencës strategjike me Kinën dhe përhapjes së krizave në Lindjen e Mesme dhe Afrikë.
Raporti i bën thirrje vendeve anëtare dhe Shërbimit të Veprimit të Jashtëm të BE-së “të eksplorojnë nënshkrimin e partneriteteve të reja të mbrojtjes me vendet e Ballkanit Perëndimor, Zvicrën, Turqinë dhe Indinë”, duke theksuar se këto marrëdhënie do të ndihmojnë në forcimin e sigurisë në kufijtë juglindorë të Evropës dhe në integrimin e mëtejshëm të rajonit në arkitekturën e përbashkët evropiane të sigurisë.
Mundesh me e lexu edhe…
Në raport theksohet gjithashtu rëndësia e ruajtjes së bashkëpunimit të ngushtë me NATO-n dhe Shtetet e Bashkuara, si dhe e krijimit të mekanizmave të përbashkët për ndarjen e informacionit, mbrojtjen e infrastrukturës kritike dhe zhvillimin e industrisë së mbrojtjes.
Sipas eurodeputetëve, pa përfshirjen e vendeve të Ballkanit Perëndimor në politikat e përbashkëta të sigurisë, vizioni i një Evrope të qëndrueshme dhe sovrane do të mbetet i paplotë./Albanian Post/Katror.info
