Befasitë e sotme në Botëror, fitoret, humbjet e barazimet

Arabia Saudite befason, mposht Argjentinën e Messit

Përfaqësuesja e Arabisë Saudite ka shkaktuar befasinë më të madhe deri më tani në Kupën e Botës “Katari 2022”. Arabia Saudite e ka mposhtur Argjentinën, një nga favoritët për të triumfuar në Botëror, në ndeshjen e parë të Grupit C.

Lionel Messi ka kaluar fillimisht Argjentinën në epërsi, në minutën e 10-të nga pika e bardhë.

Arabia Saudite ka shtangur Argjentinën në fillim të pjesës së dytë, ku shënoi dy herë për ta përmbysur disavantazhin e pjesës së parë. Në minutën e 54-të, Al Dawsari shënoi gol fantastik për shifrat 2:1. Ndeshja i takon Grupit C.

Dueli i luajtur të martën, ka përfunduar me rezultatin 2:1. Me këtë fitore, Arabia Saudite i ka dhënë fund edhe serisë së Argjentinës prej 36 ndeshjeve pa humbje.

Franca triumfuese ndaj Australisë

Me gjithë mungesën e Karim Benzemas, sulmi i Francës ka funksionuar si duhet në ndeshjen e parë të Botërorit “Katari 2022”. Të martën mbrëma, Franca fitoi 4:1 ndaj Australisë. Kështu francezët nisën me fitore bindëse mbrojtjen e titullit që e fituan katër vjet më parë në Rusi.

Tunizia barazon me Danimarkën

Përfaqësuesja e Danimarkës nuk e ka marrë më shumë se një pikë në ndeshjen e parë të Grupit D në Kupën e Botës “Katari 2022”. Të martën, Danimarka luajti pa gola kundër Përfaqësueses së Tunizisë.

Edhe pse danezët konsideroheshin favorit në këtë përballje, ata nuk arritën ta thyenin Tunizinë, që ishte mirë e vendosur në mbrojtje.

Ky barazim i Danimarkës është vlerësuar si befasi, duke pasur parasysh futbollistët që i ka në radhët e veta.

Edhe Polonia barazon me Meksikën

Polonia nuk ka arritur më shumë se një barazim në ndeshjen e saj të parë të Grupit C në Kupën e Botës. Polonia ka luajtur pa gola kundër Meksikës, ndonëse ka mundur të shënojë fitore sikur kapiteni Robert Leëandoëski mos të dështonte nga penalltia.

Gjuajtjen e Leëandoëskit në minutën e 58-të, e priti portieri i Meksikës, Guillermo Ochoa. Për Ochoan, ky është Botërori i pestë. Ndërkohë, për Leëandoëskin, kjo ishte ndeshja e katërt në Kupën e Botës që ende nuk ka shënuar gol.