Në kuadër të një projekti të rëndësishëm për ruajtjen dhe promovimin e trashëgimisë kulturore bashkëkohore, një grup i përkushtuar bibliotekarësh dhe studiuesish në Bibliotekën Kombëtare të Kosovës “Pjetër Bogdani” është duke punuar intensivisht për evidentimin, klasifikimin dhe organizimin e koleksionit të artit bashkëkohor që gjendet në Bibliotekën e Arteve Bashkëkohore, shkruan Katror.info.
Ky koleksion i veçantë përfshin një gamë të gjerë materialesh: libra tematikë dhe monografi për artistë të njohur vendorë e ndërkombëtarë, katalogje ekspozitash dhe retrospektivash, dokumentarë dhe performanca artistike në format CD dhe DVD, pllaka vinili me regjistrime audio arkivore, si dhe revista dhe botime periodike që trajtojnë zhvillimet më të fundit në artin bashkëkohor dhe kritikën artistike. Në përbërje të fondit janë edhe kaseta manjetofoni, që pasqyrojnë një dimension të rëndësishëm të historisë së artit eksperimental.
Materialet janë në gjuhë të ndryshme, përfshirë anglisht, gjermanisht, kroatisht, turqisht, koreanishte, tajvanez, bullgarisht, maqedonisht dhe shqip, dhe përfaqësojnë botime nga Evropa, Azia, Amerika dhe Ballkani Perëndimor. Figura të njohura të artit modern dhe bashkëkohor, si Salvador Dalí, Pablo Picasso, Jean-Antoine Watteau dhe Mario Sironi, janë pjesë e këtij arkivi të pasur.
Mundesh me e lexu edhe…
Procesi i punës është ndarë në tri faza kryesore: evidentimi dhe regjistrimi i çdo materiali me të dhëna të hollësishme për përmbajtjen dhe origjinën, klasifikimi alfabetik për të lehtësuar kërkimin, si dhe renditja fizike në rafte për qasje të drejtpërdrejtë nga publiku dhe studiuesit.
Ky projekt synon jo vetëm ruajtjen dhe dokumentimin e fondit ekzistues, por edhe përmirësimin e qasjes në materiale të specializuara për artin bashkëkohor dhe nxitjen e kërkimit shkencor në këtë fushë. Në përfundim të punës, koleksioni do të jetë i hapur për përdorim nga studiues, artistë, studentë dhe publiku i gjerë.
Biblioteka Kombëtare e Kosovës shpreh mirënjohje për angazhimin dhe përkushtimin e stafit të saj në realizimin e këtij projekti me vlerë të lartë kulturore dhe akademike./Katror.info.
