Federata e Boksit e Kosovës vazhdon të përfaqësohet me dinjitet në arenën ndërkombëtare, duke marrë pjesë në një tjetër turne të rëndësishëm – Kupën e Botës “Feliks Stamm”, e cila mbahet nga data 10 deri më 17 maj 2025 në Varshavë të Polonisë, raporton Katror.info.
Kosova do të përfaqësohet nga tre sportistë të përgatitur: Donjeta Sadiku (60 kg), nën udhëheqjen e u.d. selektores Marjola Sallauka, si dhe vëllezërit Bashkim Bajoku (55 kg) dhe Shpetim Bajoku (70 kg), të cilët do të drejtohen nga selektori Faton Xhakli.
Përveç synimit për medalje, turneu ka rëndësi të veçantë edhe për grumbullimin e pikëve në ranglistën ndërkombëtare të boksit, çka e bën pjesëmarrjen edhe më të vlefshme për karrierat e boksierëve tanë.
Në këtë garë prestigjioze, Kosova do të ketë përfaqësim edhe në gjykim, pasi Latif Demolli është ftuar nga Federata Botërore e Boksit për të ndarë drejtësinë si gjyqtar ndërkombëtar./Katror.info
