Ndryshe nga emra si Rita Ora, që u bë e famshme me “Hot Right Now” apo Dua Lipa që magjepsi producentët e Lana del Ray-t me “Be the One”, Era Istrefi u kthye në fenomen për shkak se arriti suksesin jashtë kufijve me producentë shqiptarë dhe me tekst krejt shqip.
Asokohe, videoja e Erës teksa këndonte këngën hit qarkulloi kudo dhe të shumtë qenë njerëzit që e cilësuan këngëtaren si “vajzën e Rihanna-s dhe Sia-s”.
Si rrjedhojë, “Bonbon” ra në veshët e “Ultra Music”, që mori në menaxhim Erën. Sot, “Bonbon” është kënga shqiptare më e dëgjuar në botë me më shumë se 860 milionë klikime në YouTube.
Në 2018, Era u bë e para dhe e vetmja shqiptare që këndoi në finalen Kupën e Botës. Pasaporta nuk e pengoi Erën të performonte “Live It Up” me Will Smith dhe Nicky Jam në Rusi, një shtet që nuk e njeh Kosovën.
Pas ‘Bonbon’, Era publikoi edhe disa projekte të suksesshme në gjuhen angleze. Pas dy viteve pauzë dhe rregullim të kontratës me ‘Ultra Music’, këtë vit ajo filloi sërish publikimin e këngëve në gjuhën shqipe. Në mars ajo publikoi këngën ‘Bebe‘, në maj ‘TKRKT‘ dhe së fundmi publikoi këngën ‘Hala‘ – një bashkëpunim me Don Xhonin, i cili u pëlqye ndërkombëtarisht dhe momentalisht ka mbi 12 milionë klikime në YouTube.