Banka Qendrore e Republikës së Kosovës (BQK) ka mirëpritur vlerësimet pozitive të Komisionit Evropian në Raportin e vitit 2025, i cili konstaton se sektori financiar i Kosovës ka ruajtur një nivel të lartë stabiliteti, kapitalizimi të mjaftueshëm dhe ka shënuar përparim të dukshëm në harmonizimin me standardet e Bashkimit Evropian.
Sipas raportit, bankat në Kosovë operojnë me nivele të larta kapitali dhe likuiditeti, ndërsa kreditë joperformuese mbeten në nivelin më të ulët historik. Një vlerësim i veçantë i është dhënë miratimit të rregullores për shtesat makroprudenciale të kapitalit dhe planit për zbatimin e procesit të rishikimit dhe vlerësimit mbikëqyrës (SREP), në përputhje me udhëzimet e Autoritetit Bankar Evropian (EBA).
Në fushën e pagesave, Komisioni Evropian thekson miratimin e Ligjit për Shërbimet e Pagesave, anëtarësimin e BQK-së në EACHA dhe rritjen e ndjeshme të përdorimit të pagesave elektronike. Po ashtu, është vlerësuar zgjerimi i shërbimeve financiare në komunat veriore të vendit.
Mundesh me e lexu edhe…
Raporti njeh edhe masat e ndërmarra kundër falsifikimit të euros, progresin në fushën e digjitalizimit dhe të financave të qëndrueshme, si dhe forcimin e qasjes në financim për ndërmarrjet e vogla dhe të mesme përmes Fondit Kosovar për Garanci Kreditore (FKGK). Përparim është shënuar edhe në kornizën kundër pastrimit të parave dhe financimit të terrorizmit (AML/CFT), si dhe në zbatimin e ligjit për Kripto-Asetet, me kalimin në mbikëqyrje të bazuar në rrezik.
Komisioni ka vlerësuar gjithashtu forcimin e qeverisjes së brendshme të BQK-së, përfshirë riorganizimin institucional, politikat e avancuara të burimeve njerëzore dhe krijimin e divizionit të sigurisë kibernetike.
Megjithatë, në raport theksohet nevoja për avancimin e mëtejshëm të mbledhjes së të dhënave financiare, zhvillimin e kornizës për rimëkëmbjen bankare dhe përmirësimin e infrastrukturës së tregut financiar.
BQK ka riafirmuar përkushtimin e saj për të vazhduar reformat dhe përafrimin e plotë me acquis të BE-së, duke falënderuar Komisionin Evropian për vlerësimin dhe bashkëpunimin e vazhdueshëm./Katror.info
